Ôi ntri (28/2), ta Nhih pah kan Chính phủ, Thủ tướng Chính phủ Phạm Minh Chính ƀư tơm rơh tâm nchră an ƀư nău dơn kan hun hao ntŭk tăch rgâl chứng khoán năm 2024 tă bah Bộ Tài chính, Văn phòng Chính phủ kan nsum ƀư.

Lah ta tâm nchră, Thủ tướng Chính phủ Phạm Minh Chính lah rjăp, ntŭk tăch rgâl chứng khoán Việt Nam lah du ntil ntŭk  tăch rgâl gưl têh, du gâl  jêng khlay bah ntŭk tăch rgâl prăk kaih lah êng n’hanh jâng wăng sa tăch rgâl rƀŏng tât xã hội chủ nghĩa ta dak  he lah nsum; lah du trong ntuh kơl ngăch ngăr, wăch uĕh; trong rgum tơm prăk rgum n’hanh jŏ jong khlay an doanh nghiệp; rgop khlay ntrŭt ntrôl dăp rgum tay jâng wăng sa, cổ phần hóa doanh nghiệp Ngih dak, rgâl mhe trong ntĭt leo hun hao wăng sa- rêh jêng kon nuĭh. Mpeh nău dơn kan, trong nkra tơm khlay let năp tay, Thủ tướng Chính phủ đă Bộ Tài chính, Uỷ ban Chứng khoán Ngih dak kan nsum đah Ngân hàng Ngih dak, Bộ Kế hoạch n’hanh Đầu tư ndrel ăp n’gâng kan geh tât rgum rdâk njêng n’hanh an ƀư dĭl ăp bôk nău kan na nê̆ mpeh tĭng ƀư trong hun hao jŏ jong ntŭk tăch rgâl chứng khoán tât năm 2030.