VOV4.M’nông – Măng 15/2, Thủ tướng Chính phủ Phạm Minh Chính lĕ điện tâm nchră đah wa Albert Bourla, Kruanh nkre ƀư Kruanh ƀĭt joet Tập đoàn Pfizer. Ta rơh điện tâm nchră, Thủ tướng Chính phủ Phạm Minh Chính lah uĕh, uănh lah prêh Tập đoàn Pfizer n’hanh êng wa Kruanh Pfizer khay bah năp lĕ tâm rgop săk rnglăy đah ăp ngih pah kan bah Việt Nam gay lôch jêh pă manh ơm n’hanh tŏng ăp 51 rkeh dĭng vaccine njrăng n’gang Covid-19 an Việt Nam tĭng dăn đă bah Việt Nam ta rơh kuăl tâm nchră đah Thủ tướng nar 20/8/2021.

Thủ tướng Phạm Minh Chính

Thủ tướng Phạm Minh Chính an gĭt, mhe rlău Việt Nam lĕ nglăp rwăt vaccine bah Pfizer chuh an kon se bah 12-17 năm deh, tât aƀaơ, nglai 1 geh bơi 96%, nglai 2 geh bơi 90% n’hanh aơ lah nău nsrôih dŭt têh. Nău aơ kơl kon se đăp mpăn n’hanh uĕh lơn rnôk hăn nti tay. Ta năp nu nău srê geh jêr jŏt, gay đăp mpăn săk soan bah kon se n’hanh ƀư tĭng săk rnglăy nău pơk tay mpông ngih sam ƀŭt đăp mpăn, Thủ tướng đă Kruanh, nkre ƀư kruanh ƀĭt joet Pfizer uănh mĭn ntrŭt lơ ơm lơ uĕh nău pă manh 22 rkeh dĭng vaccine an kon se bah 5 tât 12 năm deh ta Việt Nam tâm ăp nar tât.

 Nuĭh rblang: Y Sưng Phê Ja