Măng 28/6, Thủ tướng Chính phủ Phạm Minh Chính n’hanh kruanh rđău kan gưl têh Việt Nam hŏ sĭt bah thủ đô Bắc Kinh, Trung Quốc, dŭt jêh uĕh lăng hăn khâl ngăn dak Cộng hòa nhân dân Trung Hoa n’hanh Râng tâm nchră way ăp năm ăp nuĭh leo lor bôk năp tâl 14 bah Rgum nchră wăng sa lam ntŭr neh (WEF). Aơ lah hăn khâl Trung Quốc lor bôk năp bah wa Phạm Minh Chính ta nău kan Thủ tướng Chính phủ. Hăn khâl hŏ geh nău dơi uĕh lăng n’hanh geh âk nău dơi khlay. Nsing nơm chính trị đah bar dak dơi n’hao dăng, njêng ntŭk nsing khlay gay ntrôl dăng n’hanh ƀư jru hvi lơn tâm boh têh jong lam lĕ rngôch Việt Nam- Trung Quốc tâm nô nău mhe, nsĭt tay nău geh an ƀon lan bar dak.

Thủ tướng he tâm nchră, ôp srĭng nău đah lĕ rngôch 04 kruanh rđău kan dŭt têh bah Trung Quốc. bar ding lah rjăp da dê nău khlay bah nău n’hao dăng nsing nơm chính trị, nkra di nuih n’hâm n’hanh kân bah tâm rkeh, ndơ̆ tâm boh têh jong lam lĕ rngôch Việt Nam-  Trung Quốc hun hao đăp mpăn, kloh rvah, nsĭt geh nău tam jŏ jong. Bah meng ăp nău kan ngăn, Thủ tướng Chính phủ râng n’hanh lah ta rgum nchră doanh nghiệp Việt Nam - Trung Quốc, đah nău tât râng dŭt âk mpưm bah doanh nghiệp Trung Quốc, mâp nuĭh gĭt blău tâm rnglăp, mâp đah âk doanh nghiệp têh bah Trung Quốc, hăn uănh Nkual mhe Hùng An - đô thị ntil mhe mpeh rgâl dơh soih pơk hvi mpông n’hanh rgâl mhe nău blău bah Trung Quốc ta n’gor Hà Bắc…. ăp doanh nghiệp rnê âk da dê ntŭk ntuh kơl n’hanh mpŏng hao ntuh kơl bah Việt Nam, nkre mpơl nău ŭch  rŏng pơk hvi ntŭk ntuh kơl tâm Việt Nam let năp tay./.