Kêng măng 20/7, Thủ tướng Phạm Minh Chính hŏ wơt Bộ trưởng Bộ Tài chính Hoa Kỳ Janet Yellen. Thủ tướng rhơn rnê ăp nău kan tâm boh, ăp nău uănh năl tâm di bah Bộ Tài chính Hoa Kỳ mpeh mât bôk kan prăk kaih, rnoh khlay prăk bah Việt Nam. Kalơ nuih n’hâm nsing nơm, rah rơch, ngăn ngăn, Thủ tướng dăn đă bar ding tâm hăn khâl nsum gưl têh n’hanh ăp gưl, n’hao dăng buăt nthoi đah jâng wăng sa bar dak, ntrôl dăng tâm boh wăng sa, tăch rgâl, ntuh kơl, tâm nê geh hun hao kloh uĕh, rgâl mhe, công nghệ mhe, rêng pă an mhe… Nkre, ntrŭt ntrôl tâm boh rdâng lơh đah rgâl trôk nar, tĭng ƀư nău mbơh nsum ndơ̆ rgâl ŭnh nar geh nău tâm ban, ntop kơl Việt Nam hun hao n’gâng kan  công nghiệp ŭnh nar sĭt jêng tay.

Bộ trưởng Tài chính Hoa Kỳ lah rjăp Việt Nam lah dak tâm boh khlay đah Hoa Kỳ n’hanh geh nău khlay kan n’gâng tơm tâm njăr trong hăn Ấn Độ Dương – Thái Bình Dương bah dak dja. Hoa Kỳ ŭch rŏng ntrôl dăng tâm boh, tăch rgâl đah Việt Nam; geh trong nchrăp n’hao dăng tâm boh đah Việt Nam mpeh rêng pă an nsing ta tâm boh lam lĕ rngôch, nsing nơm; ntop kơl Việt Nam n’hao dăng ƀư njêng chip bán dẫn n’hanh ŭnh nar sĭt jêng tay./.