VOV4.M'nông: Kêng măng 26-1, Thủ tướng Phạm Minh Chính khâl, mbah rhơn Tết cán bộ, tahen Pôih n'har bri Mpông n'har bri hăn dak bah dih Móng Cái. Ntơh măt Kruanh rđău kan Đảng, Ngih dak, Thủ tướng Chính phủ Phạm Minh Chính njuăl tât lĕ rngôch cán bộ, tahen Pôih n'har bri Mpông n'har bri Móng Cái, ăp mpôl tâm rgop âk n'gâng kan ta Mpông n'har bri nău ôp khlâl n'hanh mbah rhơn dŭt uĕh lăng. Thủ tướng lah rjăp, Quảng Ninh lah n'gor geh ntŭk gŭ khlay mpeh rnă njrăng, njrăng n'gang neh dak, lah mpông rlong tâm boh dak bah dih dŭt têh bah neh dak. Jêng, mpôl tahen n'har bri geh nău dơn kan dŭt khlay, rgop mât njrăng ƀư tơm neh dak, nta trong dơh an hun hao wăng sa- rêh jêng kon nuĭh. Mpeh nău dơn kan rgum tơm tâm năm 2022, Thủ tướng dăn đă, mpôl tahen n'har bri ân gĭt kloh nău kan mât njrăng nâp ƀư tơm neh dak, lam lĕ rngôch neh dak n'hanh trong n'har bri neh dak; mât nâp đăp mpăn ta nkual n'har bri gay ntrŭt ntrôl tâm nđŭr, tâm boh, tâm rnglăp n'hanh hun hao; mô khuch tât nău đăp mpăn rgum, tâm rnglăp, tâm boh đah dak băl. Tĭng ƀư jăp pah kan tâm boh bah dih n'har bri; rgop rdâk njêng n'har bri đăp mpăn, tâm rnglăp, tâm boh n'hanh hun hao./.

Nuĭh rblang: Điểu Thân