Kêng măng 5/2, Thủ tướng Chính phủ Phạm Minh Chính hŏ tât khâl Cục Cảnh sát giao thông, Bộ Công an n’hanh mbah rhơn Tết, rgŏ jă cán bộ, tahen mpôl Cảnh sát giao thông lam dak. Tâm bah ri aơ nơh, mpôl Cảnh sát giao thông hŏ ƀư jăp pah kan nsŏng kơl rdâk njêng, lôch jêh pháp luật; ăp nău rđău đă khlay mpeh pah kan  mât đăp mpăn hăn ntung trong bah Ban Bí thư, Chính phủ, Thủ tướng Chính phủ.

Tĭng ƀư pah kan mât đăp mpăn hăn ntung trong, leo ăp mpôl kruanh rđău kan Đảng, Ngih dak, ăp mpôl năch tâm dak, dak bah dih tât khâl n’hanh pah kan ta Việt Nam, đăp mpăn mbluh soih aih gung trong hăn. Nsrôih râng njrăng, n’gang trôk nar, phŭt sial  lơh, kơl joi nuĭh tât rmanh. Lah ta aơ, Thủ tướng Phạm Minh Chính đă, Mpôl Cảnh sát giao thông tĭng ƀư jăp nău khlay kan mât đăp mpăn hăn ntung trong. Rgâl  mhe tay nău kan rsong hăn, nkra rmal mpeh đăp mpăn hăn ntung trong; n’hao âk  dŏng khoa học công nghệ tâm nău ban saơ, nkra rmal, đăp mpăn mbơh kloh. Tâm rnôk Tết Nguyên đán Giáp Thìn, mpôl hăn rsong uănh, nkra rmal nuĭh tih; mô an geh kol khan, năn ngăch nkra ăp nău tât, prah tâm tom  ndeh, yor ma nău rhơn răm n’hanh đăp mpăn bah ƀon lan./.