Kêng măng 5/4, Thủ tướng Chính phủ Phạm Minh Chính hŏ geh rơh pah kan đah Thủ tướng Lào Sonexay Siphandone. Ta rơh mâp, Thủ tướng Phạm Minh Chính hŏ mbah rhơn Lào ƀư geh nău dơi Tâm nchră ủy hội sông Mê Kông dak bah dih tâl 4, lôch nê rgop n'hao nău khlay kan bah Lào tâm  nkual. Bar Thủ tướng rhơn n'hanh rnê âk nău hun hao uĕh lăng tâm boh tâm rnglăp têh kuâng, tâm rnglăp mha êng n'hanh tâm boh lam lĕ rngôch Việt Nam – Lào ta ăp trong kan đah bar dak tâm bah ri aơ.

Lơn lah, tâm boh tăch rgâl lah ntŭk chrat ang đah nsĭt geh bar ding lĕ ma năm 2022 geh rlău 1,7 rmen USD, hao rlău 24% rđĭl đah năm 2021. Bar ding nsrôih an ƀư nău tâm ton trong tâm boh têh dơi jŏ jong Việt – Lào lvang năm 2021-2030, Hiệp định tâm boh bar ding Việt-Lào 2021-2023 n'hanh ăp nău tâm ton, trong nchrăp tâm boh hŏ ký ta ăp trong kan; ƀư nsum tay mât đăp mpăn rnă njrăng, đăp mpăn lam rêh jêng kon nuĭh; n'hao dăng tâm boh rnă njrăng, njrăng n'gang neh dak. Bar ding tâm ban ŭch n'hao têh tâm boh wăng sa; ntop kơl nsum dâk hao tay lôch bah kơi nuh srê, rdâk njêng jâng wăng sa mât êng, nsrôih ndôr êng, nkre đah lăp rgum dak bah dih ngăn ngăn, jru hvi n'hanh geh nău tam .