Kêng măng 16/3, ta Nhih pah kan Chính phủ, Thủ tướng Chính phủ Phạm Minh Chính ƀư tơm rơh pah kan đah ăp Đại sứ, Kruanh nhih pah kan ntơh măt Việt Nam gŭ ta dak bah dih năm kan 2023-2026 lor rnôk hăn dơn nău kan. Tĭng Bộ Ngoại giao,16 Đại sứ, Kruanh nhih pah kan ntơh măt Việt Nam ta dak bah dih dơn nău kan rơh dja, nkre mât ŭanh nău kan ta 48 dak, nkual neh  ta lĕ rngôch ăp châu lục.

Ta rơh pah kan, Thủ tướng Chính phủ Phạm Minh Chính lah rjăp, ăp năm rlău aơ, n'gâng kan tâm boh dak bah dih mô rlu têh dăng, rgop khlay tâm rnôk rdâk njêng neh dak, tâm nê geh nău rgop bah ăp nhih pah kan ntơh măt Việt Nam ta dak bah dih. Thủ tướng an lah, nău dơn kan bah ăp Nhih pah kan ntơh măt Việt Nam ta dak bah dih dŭt jâk. Jêng, ăp Đại sứ, Kruanh nhih pah kan ntơh măt Việt Nam ta dak bah dih ân srôih dăng n'hanh ngăch ngăr tĭng ƀư trong nchrăp, gung trong tâm boh đah dak bah dih bah Đảng, Ngih dak, ăp Kruanh ntơh măt ân ntrŏng tâm boh wăng sa rhŏ dŏng hun hao, rgop tâm rdâk njêng jâng wăng sa mât njrăng êng n'hanh lor nchrăp, nsrôih lăp rgum wăng sa lam  ntŭr neh jru hvi, lam lĕ rngôch n'hanh geh nău tam lah du trong an ƀư lor âk tâm năm pah kan bah he.