Ôi 13/6, ta Hà Nội, Thủ tướng Chính phủ Phạm Minh Chính pah kan đah Ban Thường vụ n’hanh đại biểu Hội  Nhà báo Việt Nam nkhêp di nkah gĭt 98 năm Nar Báo chí cách mạng Việt Nam 21/6. Ntoh ngơi ta nar pah kan Thủ tướng Phạm Minh Chính mĭn lah, Báo chí lah trong nkoch trêng ta ăp ntil nău mĭn văn hóa bah Đảng, tâm nĕ Hội Nhà báo Việt Nam geh nău ƀư khlay tâm rnglăp, rgum nsum, n’hao janh dăng chíanh trị, ntĭm nti tay nău kan, tiăr nti nău mĭn pah kan bah ăp nuĭh ƀư báo. Thủ tướng Phạm Minh Chính njuăl nău mbah rhơn uĕh lăng ngăn n’hanh uănh lah prêh, rnê rhơn ăp nău geh, nău rgop khlay bah Hội Nhà báo Việt Nam n’hanh ăp nuĭh ƀư báo ta lam dak.

Thủ tướng đă Hội Nhà báo Việt Nam mĭn lơn tay trong nchrŏng an rmôt báo chí n’hao mĭn njêng nău kơl n’hanh nsrôih râng trong kan nkoch trêng nău kơl; ntrôl rgâl mhe mpeh nkô̆ nău, rgop n’hao săk rnglăy nău mhe, nău lư; nsrôih ndâk njêng nkô̆ nău nuĭh ƀư báo way kan; nkra di ăp nău tih mpeh nău mĭn pah kan, ntrôl khlay nhân văn tâm nău kan báo chí. Báo chí hăn lor saơ, rnê rhơn ăp nuĭh mhe, nuĭh uĕh, kan uĕh, sŏk nău uĕh jăng lơi nău mhĭk, sŏk nău nsrôih ntrôl rŭch nău ƀư mô di, nta an n’hâm soan nkoch rêng, trêng lam hvi tâm ntŭk gŭ rêh, nău rêh jêng. Ƀư uĕh groi nđôi, uănh mĭn uĕh nău rêh, pă an nău mhe di na nê̆, ngăch, ngăn ngên, kloh rah wah.