VOV4.M’nông – Kêng măng nar 22/3, ta ngih Chính phủ, Thủ tướng Phạm Minh Chính pah kan đah Ban Thường vụ Trung ương Rmôt nuĭh âk năm deh Việt Nam. Nău mbơh ta rơh rƀŭn, Kruanh Rmôt nuĭh âk năm deh Việt Nam wa Nguyễn Thanh Bình an gĭt, Rmôt âk năm deh Việt Nam nar lơ hun hao, nâp dăng đah ndâk ƀư, rgum geh âk nuĭh âk năm deh tât râng. Tât aƀaơ, Rmôt nuĭh âk năm deh lĕ geh rlău 9,7 rkeh nuĭh, geh bơi 90% dĭng lĕ nuĭh âk năm deh ta lam dak. Ntoh ngơi n’glôn jêh, Thủ tướng Phạm Minh Chính njuăl nău mbah rhơn tât lĕ rngôch nuĭh âk năm deh ta lam dak nău mbah rhơn uĕh lăng ngăn, nkre lah rjăp rơh pah kan aơ mĭn lah nău kan bah Chính phủ đah nuĭh âk năm deh, mkra du đêt trong ƀư, nău kơl đah nău ŭch nuĭh âk năm deh. Thủ tướng đă an uănh khlay lơn tay trong kan nkoch trêng, n’hao gĭt wât mpeh nău ƀư tơm, nău khlay bah nău kan, trong kan nuĭh âk năm deh n’hanh rgop bah nuĭh âk năm deh. N’hao uĕh, tam, săk rnglăy mât uănh ngih dak đah nău ƀư bah Rmôt n’hanh mât njrăng, kơl, mât uănh nuĭh âk năm deh.

Nuĭh rblang: Y Sưng Phê Ja