VOV4.M’nông – Jêh rnôk hăn uănh ngăn ta du đêt ntŭk, nău kan, nău nchrăp ƀư khlay, ôi 13/3 Thủ tướng Phạm Minh Chính n’hanh mpôl pah kan bah Chính phủ lĕ pah kan đah kruanh n’gâng tơm n’gor Khánh Hòa. Kruanh ăp n’gâng kan, nău kan Trung ương an lah, n’gor Khánh Hòa lah ntŭk geh nău kan khlay n’hanh dơi geh ƀư, dơh têh hun hao wăng sa-rêh jêng ta nkual Nam Trung bộ n’hanh Tây Nguyên, yơn mô hŏ dơi ƀư lĕ nău geh, jâng nsan têh gay hun hao.

Ntŭk nar pah kan.

Ntoh ngơi n’glôn jêh, Thủ tướng Chính phủ Phạm Minh Chính lah rjăp, Khánh Hòa geh ntŭk kan dŭt khlay hun hao wăng sa rêh jêng n’hanh rnă njrăng bri dak bah neh dak, Khánh Hòa an mât uănh rjăp, mbơh ƀư săk rnglăy Nghị quyết Đại hội 13 bah Đảng n’hanh Nghị quyết Đại hội Đảng bộ N’gor; dŏng, ƀư tĭng di trong hăn bah Đảng, nău kơl pháp luật bah Ngih dak, nău ntĭm rđău ƀĭt joet bah Chính phủ. Khánh Hòa an nâp dăng nuih n’hâm tâm rnglăp, nsrôih hao êng; n’hao tâm pă gưl, tâm pă nău dơi kan, tâm rgop lĕ nău kan hăn ndrel đah uănh nđôi, groi uănh nău dơi mkra; geh trong uănh nđôi, groi uănh săk rnglăy nău mbơh ƀư bah tĭng gưl.

Nuĭh rblang: Y Sưng Phê Ja