Kêng măng 27/11, Thủ tướng Chính phủ Phạm Minh Chính pah kan đah kruanh n’gâng tơm Nkual ƀon têh Hồ Chí Minh. N’glôn jêh nar pah kan, Thủ tướng Chính phủ Phạm Minh Chính uănh lah prêh, rnê rhơn nkual ƀon têh Hồ Chí Minh tâm nu nău geh âk jêr jŏt, ntŭl rlong lĕ dơi geh âk săk rnglăy ntoh lư tâm hun hao wăng sa-rêh jêng, nchrăp geh 15/19 rnoh ndơ ƀư geh n’hanh rlău nău nchrăp.

Ntŭk nar pah kan.

Mpeh nău kan tâm năm tât, Thủ tướng, nkual ƀon têh Hồ Chí Minh an ƀư uănh nđôi tay lĕ rngôch nău kan gay lăp tâm năm 2023 đah nuih n’hâm mhe. Ta năp măt, nkual ƀon têh an rgum tâm trong kan dăp rgum; ntrôl dăng pă an prăk ntuh kơl nsum n’hanh 3 bôk nău kan rƀong tĭng lam dak.

Thủ tướng Chính phủ Phạm Minh Chính

Tâm nĕ Nkual ƀon têh tâm rgop đah ăp n’gâng kan nău kan mkra lôch ăp wăk kol, ntrôl 5 nău nchrăp ƀư khlay geh: ăp nău nchrăp trong ndeh treng nkual ƀon têh; trong Vành đai 3 nkual ƀon têh; Jay ga T3 tach ndeh păr quốc tế Tân Sơn Nhất; cao tốc Nkual ƀon têh Hồ Chí Minh-Mộc Bài, Tây Ninh. Bah meng nĕ, Nkual ƀon têh Hồ Chí Minh an ƀư tay ăp trong njrăng, n’gang srê Covid-19, ngăn lah chuh vaccine njrăng n’gang srê an uănh nđôi sêr.