Nglôch lôch rơh rƀŭn nchră Thủ tướng lĕ mbơh rblang nău dơi nău geh bâh n'gor n’hanh lah na nê̆: Đồng Tháp lah n’gor geh âk nău dơi, nău geh; knơm âk ta n’gor aơ mbra mpơl saơ na nê̆ nău kan, nău dơi khlăy, lah ntŭk tơm bôk năp mpeh tuch tăm nâp nâl, leo hăn bôk năp ta lam dak ta du đê̆ trong kan tâm nău kan tuch tăm geh nău dơi kơt lah tui ka, biăp play, ba phe.

Thủ tướng ntĭm đă, tâm let năp tay, Đồng Tháp an geh rgum ntrôl pe nău dơi kan hun hao (ntuh kơl, dŏng ndơ, tăch an dak bah dih), sŏk dŏng ueh ntŭk tăch rgâl ta ntŭk n’hanh dak bah dih, nsrôih ntrôl ngăch nău kan pă prăk ntuh kơl nsum an dak bah dih, ngăch ndăn doh rklaih ăp nău jêr jŏt, kŏ văk, ntrôl an hun hao pah kan tăch rgâl. N’gor an geh ntrôl dăng nău kan rgâl mhe nău kan hành chính, rgâl mhe ueh ntŭk tăch rgâl, ntuh kơl, rgum an hun hao công nghiệp nkret njêng, công nghệ mhe, ŭnh nar mhe njêng. Hun hao tuch tăm kloh ueh, nâp nâl, dŏng công nghệ mhe, geh njêng ăp nău kan tơm khlăy, geh nău dơi, kơl an tâm rgop pah kan jan sa- tăch rgâl bâh nău kan trực tuyến, nău tăch rgâl điện tử. Hun hao pâl nđaih ndrel đah lịch sử kăl e, nău way ơm, nău ueh văn hóa, tâm di đah nău ơm geh, ăp ntil ndơ ơm geh ta ntŭk.