VOV4.M’nông: Kêng măng 19/8, Thủ tướng Phạm Minh Chính pah kan trực tuyến mpeh nau kan hun hao ntŭk kan tăch rgâl đah ntrong kan ntoh măt nau kan tăch rgâl Việt Nam tâm dak ba dih. Tâm nar rƀŭn, Thủ tướng Chính phủ ndrel đah Bộ Công thương, ăp n’gâng kan, ntŭk kan rƀŭn trực tuyến đah ntrong kan Thương vụ Việt Nam tâm dak ba dih hŏ tâm nchră ăp nau kan n’hao nau tam, nau săk nâp bah nau kan tăch rgâl, hun hao ndrel âk ntil ntŭk kan tăch rgâl, tŏng dơi nau ŭch, nau kan tâm rơh mhe. Ăp ntŭk kan tăch rgâl bah Việt Nam tâm dak ba dih hŏ rgum mbơh nau dơi geh, nau ŭch bah ăp ntŭk kan tăch rgâl, nau ŭch bah ăp ntŭk kan aơ, ăp ntrong kan gay ma tŏng dơi nau ŭch bah ntŭk kan tăch rgâl.

Tĭng nau mbơh bah N’gâng kan Công thương, năm 2021, rnoh tăch rgâl bah Việt Nam geh rlau 670 rmen đola leo Việt Nam tâm 20 jâng văng sa geh nau kan têh tâm lam ntur neh. 7 khay bôk năm 2022, nau geh tăch rgâl tât dak ba dih bah Việt Nam geh rlau 433 rmen đôla. Nchrăp tâm năm aơ, rnoh nau kan tăch rgâl mra geh nklăp 800 rmen đola, leo Việt Nam hao jêng rmôt 10-15 jâng văng sa geh nau kan tăch rgâl tât dak ba dih têh ngăn bah lam ntur neh./.

Nŭih rblang: H’Thi