VOV4.M'nông: Ôi 20/6, ta nkual n'har bri đah nkuâl Lộc Ninh, n'gor Bình Phước n'hanh nkuâl Memot, n'gor Tbong Khmum, Campuchia; Thủ tướng Hun Sen hŏ ƀư tơm rơh lễ wơt Thủ tướng Phạm Minh Chính n'hanh mpôl ntơh măt gưl têh Việt Nam tât râng ăp nău kan nkah ndray mpeh Campuchia.

Lah ta rơh lễ, Thủ tướng Campuchia du tơ̆ tay đŏng lah rjăp nău kan bah Việt Nam lah di ngăn, ăp tahen Việt Nam tât râng kơl hŏ ndrel Campuchia tâm n'gâng kan rklaih luh neh dak, kơl ƀon lan Campuchia klaih rlău bah mpôl nkhĭt hêng nuĭh Pol Pot, sĭt jêng tay n'hanh hun hao neh dak. Bar Thủ tướng mpơl nău rhơn nău tâm rnglăp way ơm n'hanh  tâm boh lam lĕ rngôch uĕh lăng đah Việt Nam n'hanh Campuchia rdâk tay n'hanh hun hao ta âk trong kan, nsĭt tay nău geh ngăn ngăn an ƀon lan bar dak, rgop  khlay tâm đăp mpăn, hun hao tâm nkual n'hanh lam ntŭr neh. Bar Thủ tướng lah rjăp uănh khlay tâm boh "kâng n'har uĕh lăng, tâm rnglăp way ơm, tâm boh lam lĕ rngôch, nâp dăng jŏ jong" khlay đah bar rnoi nuĭh./.

Nuĭh rblang: Điểu Thân