Ôi 24/9, Thủ tướng Chính phủ Phạm Minh Chính râng rƀŭn nchră mbơh nau kan Rgum n’gor Đồng Nai lvang năm 2021-2030, rƀŏng tât năm 2050 ndrel ntơm ƀư nau ntuh kơl tâm n’gor Đồng Nai. Ntoh nau tâm nar kan, ntoh măt Chính phủ, Thủ tướng Phạm Minh Chính kơp dơn, rnê ndrel rhơn ân ăp nau tă geh dơi ma Đảng bộ, n’gâng kan, tahen ndrel ƀon lan n’gor Đồng Nai geh nau dơi tâm rơh rlau aơ. Thủ tướng rnê prêh nau rgum kan bah n’gor Đồng Nai geh nchrăp ăp ntil, geh nau blau, nâp, tâm di, khoa học; ndâk nkra tâm nau dơi hun hao ueh nau dơi êng, nau dơi geh tât mhe, nau dăng ntul rlong, kŏ kơt lah rklaih ăp nau kol, nau ê dơi bah n’gor.

Nau rgum hŏ geh tât nau mĭn, nau rƀŏng, nkô̆ nau hun hao tơm, geh nau mhel geh ntrong kan, nau ntrŭnh kơl an ueh, pơk ntrong rƀŏng, nau mpŏng ndrel ntŭk ueh gay geh dơi hun hao mhe, njêng rnoh mhe ân Đồng Nai tâm nau geh dơi nsum bah ăp n’gor, nkuăl ƀon têh tâm lam dak. Thủ tướng đă ăp n’gâng kan, ntŭk kan Trung ương lŏ tâm rgop ƀư ân tam nau rgum bah n’gor Đồng Nai, ndrel ăp nkuăl bah lam ntŭk ƀư dơi n’hâm dăng rgum gay ma hun hao lơn tâm nau ƀư ân geh tam nau rgum kan./.