VOV4.M’nông – Thủ tướng Phạm Minh Chính nar 6/3 râng Rƀŭn nchră ntrôl hun hao wăng sa lŏ mir Dâng đŭng dak me Cửu Long tâm di đah rgâl trôk nar ta n’gor Kiên Giang. Bôk nău kan yor N’gâng kan tuch tăm mât rong n’hanh hun hao ƀon lan n’hanh 13 n’gor, nkual ƀon têh nkual Dâng rđŭng dak me Cưue Long tâm rgop ƀư. Rƀŭn nchră ntrôl hun hao tuch tăm mât rong nâp nâl dâng rđŭng dak me Cửu Long tâm di đah rgâl trôk nar lah geh nkô̆ nău khlay, ngăn ngên gay rgâl na nê̆, ntrôl dăng tay nău mbơh ƀư tĭng Nghị quyết Đại hội 13 bah Đảng n’hanh ăp Nghị quyết, nău ntrŭnh, nău kơl bah Đảng, Ngih dak, Chính phủ mpeh hun hao tuch tăm mât rong. Tĭng nău rƀŏng hun hao nkual Dâng rđŭng dak me Cửu Long tât năm 2025 geh ngăch hao GDP tuch tăm mât rong geh rlău 3%/năm. Rĭng geh bôk nuĭh nkual ƀon lan hao đêt ngăn 2 tơ̆ nkôp đah năm 2018. Ntoh ngơi ta rơh rƀŭn, Thủ tướng chính phủ Phạm Minh Chính ntĭm kloh, ntŭk gŭ, nău ƀư bah Dâng rđŭng dak me Cửu Long mât jâng nsan dŭt khlay lĕ n’ăp chính trị, wăng sa, rêh jêng, rnă njrăng bri dak, tâm rgâl đah ăp dak ASEAN n’hanh Tiểu vùng dak me Mê Công. Thủ tướng đă, joi ndơ geh ơm gay hun hao tuch tăm mât rong sinh thái geh săk rnglăy âk, ƀon lan mhe, ƀon lan gĭt blău uĕh lăng; mĭn ƀon lan tơm khlay, ƀon lan lah jâng nsan, tuch tăm mât rong lah tơm khlay; tâm di đah rgâl trôk nar, an tâm rgop rjăp tuch tăm mât rong, công nghiệp, tăch rgâl. Công nghiệp n’hanh tăch rgâl an tâm kơl hun hao tuch tăm mât rong gay nsĭt tay nău hao khlay lơn.

Nuĭh rblang: Y Sưng Phê Ja