VOV4.M'nông: Kêng măng 12/10 hŏ ƀư tâm nchră gưl têh kruanh rđău kan bu ur ASEAN tâl bar đah nău tât râng bah ăp kruanh dak ASEAN n'hanh ntơh măt kruanh bu ur, doanh nhân bu ur tât bah ăp dak ASEAN n'hanh băl tâm boh. Aơ lah nău kan tay lôch rơh  tâm nchră gưl têh kruanh rđău kan bu ur ASEAN lor bôk năp dơi ƀư tâm năm 2020 tă bah Việt Nam, Kruanh ASEAN rnôk nê nơh ƀư tơm, Tâm nchră gay njêng dơi rơh tâm rkhăch gưl dŭt têh mpeh tâm ban bu ur bu klô n'hanh n'hao dăng nkoch trêng an bu ur, lôch nê ndơ̆ bu ur ƀư rgum tơm bah ăp nău nsrôih tâm boh n'hanh rdâk njêng jâng wăng sa nsum ASEAN.

Thủ tướng Hunsen, Thủ tướng Phạm Minh Chính ndrel âk kruanh rđău kan rnê âk nău dơi bah nău mĭn mhe, uănh nê lah ntơm jâng khlay mpơl nău mât uănh đah rnoh khlay n'hanh nău n'gâng tơm bah bu ur tâm hun hao wăng sa- rêh jêng kon nuĭh ta nkual n'hanh ton âk bah ASEAN tâm nău ntrŭt ntrôl tâm ban bu ur bu klô n'hanh ndop đah bu ur bu klô. Lah ta rơh tâm nchră, Thủ tướng Phạm Minh Chính lah rjăp nău khlay n'hanh nău rgop bah ăp doanh nghiệp bu ur tâm dâk hao tay wăng sa Việt Nam n'hanh nkual. Thủ tướng nkre  lah rjăp nău ton bah Việt Nam tâm trong tâm boh đah ăp dak ASEAN gay ntrôl âk lơn đŏng nău tâm ban bu ur bu klô n'hanh n'hao nău dơi âk an bu ur, rgop tâm du nău rêh let tay nar lơn ma nâp dăng; nkrum lam n'hao nsrôih dăng êng bah nkual n'hanh lam ntŭr neh.

VOV.VN

Nuĭh rblang: Điểu Thân