Kêng măng nar 28/8, Bộ Văn hóa Thể thao n’hanh Pâl nđaih ƀư tâm nchră mpư rnê nuĭh ntoh lư tâm trong kan văn hóa năm 2023. Thủ tướng lah rjăp, Đảng, Ngih dak, Chính phủ way êng ŭanh khlay, n’gluh an dŏng n’hanh an ƀư geh nău tam âk trong nchrăp, trong kơl, rong an âk tơm ndơ gay rdâk njêng n’hanh hun hao văn hóa, mât ndray văn hóa rnoi nuĭh, hun hao văn học nghệ thuật n’hanh âk trong kan văn hóa êng ƀa ƀă.

Ntơh măt kruanh rđău kan Đảng n’hanh Ngih dak, Thủ tướng uănh khlay ăp nău rgop bah rmôt ăp nuĭh ƀư pah kan văn hóa lam dak; mbah rhơn 78 nuĭh ntoh lư nar aơ n’hanh nchih nkah, mpư rnê ăp nău nsrôih n’hanh nău  dơi geh bah n’gâng kan văn hóa tâm bah ri  aơ. Thủ tướng ŭch rŏng n’hanh nsing nơm, ăp đại biểu lah nuĭh ntoh lư nar aơ mbra ntik uĕh nuih n’hâm dơn kan bah he, lah tơm nđơr, lah suan ntrôl tay, ring lam dăng, gay lôch tâm nchră dja, mbra geh tay âk nuĭh ntoh lư, âk trong ƀư uĕh, rgop tĭng ƀư ăp nău dơn kan bah  n’gâng kan văn hóa lah êng, yor ma n’gâng kan hun hao văn hóa lah nsum./.