Kêng măng 8/4, ta hà Nội, Thủ tướng Phạm Minh Chính râng ƀư mbơh Kôp rnoh mrô uănh lah săk rnglăy ƀư tĭng ăp Tâm ton tăch rgâl dah rŏng (FTA Index) bah ăp ntŭk năm 2024.

Ta nar ƀư, Thủ tướng an lah: Tâm rnôk rgum lăp âk wăk kol, yơn he rgum lăp kâp knơm, mô tĭng tâm ăp ntil nuĭh kan ndrel; nkre joi ƀư tĭng nău geh, dŭt n’hâm rgum lăp, tâm di săk rnglăy đah nău rlơ̆ gay hun hao ngăch, nâp nâl. Thủ tướng an lah: Kôp rnoh mrô FTA lĕ pă an sam ƀŭt sam tra kloh rah wah, lĕ rngôch mpeh rnoh ƀư ăp tâm ton FTA ta ăp ntŭk; ƀư nkô̆ nău khlay, kơl Chính phủ n’hanh ăp n’gâng kan, nău kan, ƀon lan nchrŏng trong ƀư, nău kơl ƀĭt joet nkra njêng, tăch n’gluh, đăp mpăn di ngăn ngên gay ntrôl nkra njêng tăch rgâl, tăch n’gluh. Nău ntrôl đăp mpăn, ký ton n’hanh ƀư tĭng 17 FTA đah lĕ rngôch ăp jâng wăng sa, nuĭh kan ndrel têh ta lam ntŭr neh, ndơ̆ Việt Nam jêng ngoăy tâm âk dak leo bôk năp nkual n’hanh lam ntŭr neh mpeh râng ăp trong kan ndrel wăng sa ăp ding n’hanh âk trong.

Nău dŏng, ƀư tĭng geh săk rnglăy ăp FTA rgop ntrôl geh prăk tăch n’gluh hao jêng âk, đăp mpăn rnoh khlay n’hanh ăp rnoh mrô wăng sa têh, rgop khlay, dŭt n’hâm an nău hun hao wăng sa bah neh dak.