Ôi aơ 8/11, ndeh păr rdeng Thủ tướng Chính phủ Phạm Minh Chính leo mpôl đại biểu gâl têh Việt Nam lĕ tât râng rơh rƀŭn nchră gâl têh ASEAN tal 40, 41, ăp rơh rƀŭn nchră gâl têh geh tât n’hanh tât khâl ngăn Campuchia tĭng nău jă bâh Thủ tướng Campuchia, Samdech Techo Hun Sen.

Aơ lah rơh tât khâl ngăn Campuchia bôk năp bâh Thủ tướng Phạm Minh Chính đah nău kan lah Thủ tướng, nkre lah rơh tât khâl bôk năp bâh nuĭh leo kan tơm ta Việt Nam tât Campuchia ta năm tâm rnglăp Việt Nam-Campuchia 2022. Ta ăp rơh rƀŭn nchră gâl têh ASEAN, Thủ tướng Chính phủ Phạm Minh Chính mbra geh ăp nău ntoh ngơi khlăy, tâm mbơh nău mĭn, nău kan tâm ban kơt ăp nău dăn đă bâh Việt Nam ndâk nsơm nău tâm rnglăp, dơn ngoăy n’hanh nău kan ƀư ndranh tơm bâh ASEAN, ntrôl dăng nău tâm rgop ta nkual, ntrôl nău tâm kơl ta âk trong kan ndrel geh mât uănh, n’hao nău tâm boh kan đah ASEAN đah ăp dak kan ndrel, n’hanh tâm mbơh mpeh ăp nău ta lam ntur neh n’hanh ta nkual đah trong kan geh gĭt an tâm ban n’hanh ueh lăng.