Ôi lơ 20/8, Thủ tướng Chính phủ Phạm Minh Chính lĕ pah kan đah rnâng kan n’gor Ủy Kon Tum mpeh nău wăng sa hun hao wang sa- rêh jêng n’hanh doh rklaih ăp nău dăn đă, mbơh dăn bâh n’gor Kon Tum hun hao ngăch, nâp nâl. Lôch geh djăt nău tâm rgop bâh nuĭh leo kan ăp n’gâng kan, Thủ tướng Chính Phủ Phạm Minh Chính rnê nău nsrôih n’hanh rnê âk nău geh bâh Đảng bộ, n’gâng kan, tahen n’hanh ƀon lan n’gor Kon Tum, tâm rgop ta nău dơi nsum bâh lam dak. Thủ tướng ntĭm đă mbơh na nê̆ ăp nău dơi geh bâh n’gor n’hanh ăp nău kŏ khan, nău an geh ndâk nkra. Tâm let năp tay, Thủ tướng đă, n’gor an geh mbơh ƀư geh săk rnglăy Nghị quyết Đại hội 13 bâh Đảng, Nghị quyết mbrô 23 bâh n’gâng kan chính trị n’hanh Nghị quyết Đại hội Đảng bộ n’gor, tâm nĕ an geh ƀư tĭng răng dăng 5 nău way leo kan n’hanh pah kan bâh Đảng. Nău knơm kâp, nău nkhêp mhe ntoh, nău geh âk n’hanh dŏng geh săk rnglăy ăp nău kan gay ma hun hao. Ndrel đah nĕ Thủ tướng đă, n’gor an geh rgum hun hao wăng sa ueh nđir, wăng sa mbrô, wăng sa tâm pleh. Ntrôl an tâm rgop ta nkual gay ma njêng ntŭk hun hao tâm ban. Ndrel đah nău hun hao wăng sa bâh n’gor đah ăp n’gor ta nkual duyên hải trung bộ tĭng trong hăn quốc lộ 14, 24 n’hanh trong n’har bri Việt Nam- Lào-Campuchia.

Ta năp nĕ, tâm bôk nău kan ta n’gor Kon Tum, Thủ tướng Phạm Minh Chính ndrel mpôl pah kan lĕ hăn uănh nđôi du đêt ntŭk, nău nchrăp ƀư wăng sa-rêh jêng ta n’gor Kon Tum. Thủ tướng Chính phủ Phạm MInh Chính n’hanh mpôl pah kan lĕ hăn uănh dăp rgum hun hao điện sial ta n’gor Kon Tum ta xă Tân Lập, nkuăl Kon Rẫy. Thủ tướng đă ăp n’gâng kan, nău kan, ngih pah kan n’hanh n’gor Kon Tum uănh nđôi tay đah dăp rgum nsum bah lam nkual n’hanh lam dak; đăp mpăn mbơh rah wah, kloh uĕh; tâm di nău ntrŭnh mât uĕh săk rnglăy tơm prăk ntuh kơl, joi dŏng nău geh hun hao ăp nău nchrăp ƀư ŭnh nar nkra njêng tay ta lam n’gor Kon Tum. Thủ tướng hăn uănh ntŭk dăp rgum tach ndeh par Măng Đen; ntŭk nchrăp ƀư trong cao tốc Kon Tum-Quảng Ngãi; Quốc lộ 24 nthoi n’gor Kon Tum đah n’gor Quảng Ngãi; nkual nchrăp ƀư wăch rgum nău nchrăp ƀư nkual ƀon têh, tổ hợp dịch vụ, pâl nđaih tâm nkual Đông Nam ta nkuăl Kon Plông, n’gor Kon Tum. Jêh rnôk uănh ta ntŭk, djăt nău mbơh mpeh nău hun hao nkual pâl nđaih lam dak Măng Đen n’hanh ntung trong boăt nthoi, Thủ tướng Chính phủ Phạm Minh Chính an gĭt, nău hun hao nkual pâl nđaih lam dak Măng Đen tâm di đah trong hun hao uĕh nđĭr, nâp nâl, lĕ rngôch bah n’gor Kon Tum; đă n’gor Kon Tum tâm rgop đah ăp n’gâng kan, nău kan ngih pah kan ƀư uĕh trong kan dăp rgum gay mât uĕh nău dơi têh dăng, ntoh lư, dơh tâm rlong n’hanh dơi rblang ăp nău mô hŏ dơi ƀư bah Măng Đen; lơh lah mô phah nău geh ơm, ƀư rgâl nău uĕh Măng Đen.

Kêng măng ndrel nar 19/8, tât khâl ƀon văn hóa pâl nđaih Kon Pring ta nkuăl têh Măng Đen, Thủ tướng Phạm Minh Chính lah na nê̆, tâm rnglăp lah nău khlăy tơm, lah du nău ntrŭnh geh dơi bâh cách mạng Việt Nam, nkre lah du nău way ơm dŭt khlăy bâh mpôl rnoi he, yor nĕ, ƀon lan an geh mât n’hanh n’hao.

Thủ tướng đă ƀon lan ăp mpôl rnoi tâm pêt tâm kơl ntrôl an hun hao wăng sa, rêh jêng, ƀư tĭng nău ntrŭnh, trong kan bâh Đảng, nău kơl, pháp luật bâh ngih dak, mât đăp mpăn rnă njrăngm mô djăt mô tĭng, mât ueh nău way ơm mpôl rnoi..Di rơh ntơm lăp năm nti mhe 2023-2024, tât khâl ngih nti mầm non Măng Đen ta nkuăl têh Măng Đen, nkuăl Kon Plông, Thủ tướng Phạm Minh Chính mpơl nău ŭch ăp nai nti an geh ƀư tĭng nău rgâl mhe tâm nău ntĭm nti, đă ngih nti nchrăp ueh ăp jrô nti. Di rơh aơ, Thủ tướng Chính phủ pă an rnoh ndơ kơl 1 rmen prăk gay ma ngih nti ntuh kơl ƀư ueh ndơ dŏng, rvăt tay ndơ dŏng nti, ndơ pâl an oh kon se.