VOV4.M’nông- Ôi nar 31/7, Thủ tướng Phạm Minh Chính lĕ tât uănh năl, pah kan n’hanh nchră trong kan doh rklaih jêr jŏt, kŏ văk ta nău nchrăp kan pơk hvi nău kan nkra njêng lvang 2 ngih máy gang thép Thái Nguyên. Geh ntơm njêng bâh năm 2007, đah lĕ rnoh prăk ntuh kơl bôk năp lah 3.800 rmen prăk, yơn nău nchrăp kan aơ têk nkre jŏ jong tât aƀaơ ê hŏ lôch n’hanh hôm nha geh âk jêr jŏt, kŏ văk. Lôch geh hăn uănh năl, Thủ tướng lĕ leo rơh pah kan đah ăp n’gâng kan, ntŭk kan, doanh nghiệp gay ma djăt mbơh tơih, rgop nău, dăn đă bâh ăp ding geh kan.

Thủ tướng lah na nê̆, nău kan khlăy ngăn ngăch ndal ngăn lah ngăch joi  ăp trong kan mât kan tâm di an nău nchrăp kan gay ma mbơh tơih an ăp gâl kan geh nău dơi uănh n’hêl, ntrŭnh mbơh, lôch geh uănh năl, tâm nchră, mbơh rblang na nê̆ bâh nău kan ngăn, khoa học, pháp lý, mât đăp mpăn mpêt nkrem, săk rnglăy wăng sa dŭt âk an ngih dak n’hanh doanh nghiệp. Lôch geh djăt nău mbơh tơih , Thủ tướng lah na nê̆, aơ lah nău nchrăp kan ntoch jong, ƀư mbrơi âk năm an geh rgum mât njrăng lôch ueh tĭng di nău ntrŭnh bâh pháp luật, uănh nđôi na nê̆ tĭng ăp nău ntĭm đă bâh n’gâng kan chính trị, nglôch lôch bâh mpôl kan ôp uănh năl kan.

Nuĭh rblang: Thị Đoắt