Ta nău pĭch rlâm âk dôl geh dŭt âk ta ăp n’gor, tâm bôk nău pah kan ta Đồng bằng Sông Cửu Long, kêng măng lơ 11/8 Thủ tướng Phạm Minh Chính ndrel đah mpôl pah kan bâh chính phủ n’hanh Bí thư n’gor Ủy 3 n’gor Cà Mau, Sóc Trăng, Bạc Liêu hăn uănh năl, uănh nđôi, uănh năl nău pĭch rlâm kơh dak me, dak lêng dôl geh dŭt âk ta ăp ntŭk aơ. Lôch geh hăn uănh nđôi nău ngăn, Thủ tướng Phạm Minh Chính n’hanh mpôl pah kan bâh Chính phủ geh rơh rƀŭn nchră đah nuĭh leo kan 3 n’gor Cà Mau, Sóc Trăng n’hanh Bạc Liêu gay ma uănh năl nău kan n’hanh ndâk nkra ntŭk pĭch rlâm kơh dak me, dak lêng ta ăp n’gor aơ.

Ntoh ngơi ta rơh pah kan đah 3 ntŭk, Thủ tướng Phạm Minh Chính đă, năp lor ăp ntŭk an geh leo kan mât đăp mpăn nău rêh an ăp rnăk ƀon lan dôl geh rluh rlâm neh, ntŭk gŭ njưh, ntŭk mhe ntrơn gŭ. Leo kan ntrơn dâl ăp rnăk ƀon lan ta nkual mbra geh nău pĭch rlâm neh, der geh n’gơ neh, geh tât nău sôt rmanh an  nuĭh ƀon lan. Thủ tướng đă ăp n’gâng kan ntŭk kan leo kan gĭt na nê̆ nău tât, ntĭm đă, mbơh tơih njrăng, ndâk nkra nău tât pĭch rlâm tĭng nău dơi kan, trong kan n’hanh nău dơi geh pă jao, mât đăp mpăn ngăch, săk rnglăy, tâm di đah nkô̆ nău ngăn, ngăch mbơh tơih, dăn đă ăp gâl kan geh nău dơi ntĭm đă njrăng rmal đah ăp nău rlet rlău nău dơi mât uănh.