Kêng măng 16/8, Thủ tướng Phạm Minh Chính vơt wa Nir Barkat, Kruanh n’gâng kan văng sa ndrel công nghiệp Israel. Thủ tướng lah rjăp, Việt Nam mro uănh khlay nau tâm boh Việt Nam-Israel. Nchră tât nau kan văng sa geh âk nau dơi ntop tâm kơl, Thủ tướng đă 2 ding ơm ntrŭnh ân geh săk tam nau tâm ton dah rŏng tăch rgâl Việt Nam-Israel ndrel mĭn njêng nau tâm nchră, kí ton nau tâm boh tâm nau kan công nghiệp đah 2 dak.

Njêng nau nơih ân nau kan tâm nchră rmôt kan tăch rgâl, tâm rgop ƀư ăp nau kan tăch rgâl, nthoi nau tăch rgâl; Israel n’hao nau rvăt ăp ntil ndơ geh nau dăng bah Việt Nam kơt tui ka, bum play, ndơ geh ê nkra ơm ndrel ăp ntil ndơ dŏng. Thủ tướng đă 2 ding ân ntrŭt dăng tâm boh mpeh nau blau mhe, nau kan công nghệ prêh, tâm boh dak lêng, rdâng đah rgâl mhe trôk nar, tâm nê geh tâm boh rdâng đah nau kro phang bah ăp n’gor miền Trung, ntĭm ntĭ nŭih blau nau kan./.