Kêng măng nar 19/5, ta nkual ƀon têh Hiroshima, tâm rnôk hăn pah kan ta Nhật Bản, Thủ tướng Phạm Minh Chính wơt kruanh rđău kan, ntơh măt mpôl đăp mpăn tâm rnglăp Hiroshima - Việt Nam, Mpôl Hiroshima - Việt Nam n’hanh Mpôl tâm rnglăp Việt Nam - Nhật Bản n’gor Hiroshima.

Ta rơh wơt, Thủ tướng ŭch rŏng ăp mpôl tâm rnglăp bah Hiroshima rgop ntrŭt ntrôl tay tâm boh Việt Nam đah Nhật Bản lah nsum n’hanh đah Hiroshima lah êng nar lơn ma êt lhăt, geh nău tam, luh kao kơn play âk lơn tâm let năp tay; kuăl jă ăp doanh nghiệp Hiroshima ntuh kơl, tăch rgâl âk lơn ta Việt Nam; ntrŭt ntrôl tâm nđŭr ƀon lan, buăt nthoi văn hóa đah bar dak; ntop kơl nuĭh Việt Nam  ta nkual Trung Nam Nhật Bản (nklăp 50.000 nuĭh) gŭ rêh, kơt nti n’hanh pah kan dơh soih, mât uĕh nău khlay kan ƀư ntung njŏ đah bar dak. Wa Akagi Tatsuo, Groi Kruanh Mpôl tâm rnglăp tâm boh Hiroshima-Việt Nam lah rjăp ăp mpôl tâm rnglăp mbra nsrôih an ƀư ăp nău kan tĭng trong rƀŏng, rđău đă bah Thủ tướng, rgop  tay an tâm boh Việt Nam - Nhật Bản.