Kêng măng 13/7, Thủ tướng Phạm Minh Chính hŏ wơt Thống đốc bang Nebraska, wa Jim Pillen, dôl geh hăn khâl Việt Nam. Thủ tướng rnê âk bang Nebraska hŏ uănh khlay n’hao dăng tâm boh đah Việt Nam. Gay ƀư jru hvi lơn tâm boh đah Việt Nam đah bang Nebraska, Thủ tướng dăn đă kruanh rđău kan n’hanh ăp nhih pah kan bah bang Nebraska n’hao âk trong tâm khâl nsum n’hanh ăp n’gor bah Việt Nam n’hanh ƀư jăp lơn đŏng nău khlay kan buăt nthoi tâm boh đah Việt Nam-Hoa Kỳ.

Thủ tướng đă, let năp tay, bang tâm nkoch tay nău tă ơm gĭt hun hao đah Việt Nam, bar ding n’hao dăng tâm  boh wăng sa, tăch rgâl, ntuh kơl, lơn lah tâm rgâl ăp ndơ tuch tăm săk geh âk; ntrôl dăng tâm boh ta ăp trong kan êng bar ding săk geh, kơt ntĭm nti, khoa học công nghệ, rgâl nău blău ƀư mhe, công nghệ mhe, prăk kaih ngân hàng, rdâng lơh đah rgâl trôk nar. Bar ding tâm ban ŭch hôm geh âk trong soih tâm boh n’hanh ntrŭt ntrôl tay tâm boh đah bang Nebraska đah Việt Nam lah nsum, n’hanh đah ăp n’gor bah Việt Nam lah êng.