VOV4.M'nông: Kêng măng 1/6, Thủ tướng Phạm Minh Chính hŏ wơt wa Khamphan Phommaphat, Ủy viên Bộ Chính trị, Tổng Thanh tra Ngih dak Lào hăn khâl, pah kan n'hanh tâm ôp trong tâm boh đah Thanh tra Chính phủ Việt Nam.

Thủ tướng Phạm Minh Chính lah rjăp tâm boh Việt Nam-Lào lah tâm boh mha êng, mô rlu dơi bun dăp n'hanh hun hao; lah rjăp tâm moh ntil nău, Việt Nam way êng uănh khlay tâm boh đah Lào, way ƀư lĕ n'hâm suan he gay ntrŭt ntrôl dăng lơn tâm boh oh nô, tâm boh êt lhăt, geh nău tam tâm lĕ rngôch ăp trong kan. Thủ tướng rnê âk lôch jêh geh tâm nchră đah mpôl ntơh măt Thanh tra Ngih dak Lào n'hanh Thanh tra Chính phủ Việt Nam; lah rjăp Chính phủ Việt Nam ntrŭt nsôr n'hanh nta trong dơh gay bar ding n'hao dăng tâm boh mpeh treng nđôi, nkra nău lah phong n'hanh njrăng n'gang sa khâm; nta ăp trong dơh gay Thanh tra Chính phủ Việt Nam ƀư ăp jrô ntĭm nti rnâng kan an cán bộ tĭng nău đă bah Thanh tra Ngih dak Lào./.

Nuĭh rblang: Điểu Thân