VOV4.M’nông: Kêng măng 10/2, ta Hà Nội, Thủ tướng Chính phủ Phạm Minh Chính râng ndrel ntoh nau ngơi tâm nar rđau nau mbơh Bôk nau kan n’hâm soan hăn nti lvang năm 2021-2025 geh ƀư trực tuyến ntơm bah ntŭk ngih rƀŭn rgum lam ntur neh Hà Nội đah 63 n’gor, nkuăl ƀon têh ndrel nthoi đah rlau 41.950 ngih săm ƀŭt tâm lam dak. Ndrel ma nau pơk mpông ngih nti plơ̆ tay tâm lam dak, aơ lah nau kan khlay, lah rjăp nau nsôih ngăn bah Đảng ndrel Ngih dak tậm nau n’hao nau pah kan mât chăm, kơl an kon se nti. Bôk nau kan n’hâm soan kon se nti năm 2021-2025 uănh năl 5 rmôt nkô̆ nau ndrel 7 nau kan mpeh nau mât chăm ndrel mât uănh n’hâm soan bah kon se jê̆, kon se nti, ntĭm nti n’hâm soan ndrel nau kan thể thap rnôk nti, ƀư nau ngêt sa, mât đăp mpăn nau sa kah ân tâm di, ntrŭt dăng nau kan nkoch mbơh nau tâm nau mât, rđau nau kan, mêt uănh, kơp, mbơh, nkoch trêng, ntĭm nti n’hâm soan ân kon se nti. Ntoh nau tâm nar aơ, Thủ tướng Chính phủ Phạm Minh Chính jao nau kan ân ăp n’gâng kan, ntŭk kan, n’gor, nkre rgum nau râng bah ăp rmôt kan, ntrŭnh ƀư nsum ma ăp nau kan, nau nchrăp geh tât gay ntrŭt dăng nau kan mât chăm ăp ntil, tâm ban mpeh săk soan, nuih n’hâm ân kon se, kon se nti./.

Nŭih rblang: H’Thi