Ta Ntŭk rƀŭn nchră ngih dak, Hà Hội, Thủ tướng Phạm Minh Chính ƀư tơm rơh rƀŭn lĕ rngôch gưl prêh ăp năm mpeh công nghiệp 4.0 năm 2023 hăn ndrel mbơh nghị quyết mrô 29 mpeh công nghiệp mhe, rgâl mhe đah bôk nău “ntrŭt rgâl mrô, rgâl uĕh nđĭr mhe rhoăt đêt tâm rnôk công nghiệp mhe, rgâl mhe neh dak tât năm 2030, uănh tât năm 2045”.

Ntoh ngơi ta rƀŭn nchră, Thủ tướng Chính phủ Phạm Minh Chính nkoch kloh, nău tâm di n’hanh hun hao bah ăp dak tâm răch năm mrô n’hanh rgop lam ntŭr neh aƀaơ lah nău têh, nkre jăch ndăn, nkre jŏ jong. Đah Việt Nam, nău wât kloh mpeh geh tât n’hanh nău đă, Chính phủ lĕ mĭn tâm di, rgâl mhe an hun hao. Lor lah, mô rlu nsrôih gay ndâk njêng tay du Chính phủ geh tŏng mât uănh hun hao tâm rnôk mrô. Nkre, ăp gưl, ăp nău kan n’hanh lĕ kon nuĭh geh âk nău rgâl bah nău wât tât nău ƀư gay dŏng geh tât n’hanh tâm di đah ntŭl rlong bah rnôk mrô.