VOV4.M’Nông- Tâm ôi nar 28/4, Thủ tướng Phạm Minh Chính tât khâl, n’hao nuih n’hâm n’hanh pă ndơ an ăp kon hoc geh nău rêh jêr jŏt bâh ngih nti THPT Dân tộc nội trú Huỳnh Cương, n’gor Sóc Trăng. Tâm mbơh đah nuĭh leo kan n’gor Sóc Trăng n’hanh nuĭh leo kan ngih nti, Thủ tướng rnê nău kơt nti, ntĭm nti bâh ăp nai nti, kon hoc, lĕ dŭt nsrôih rlet rlău nău jêr jŏt, nsrôih ăp nar gay ma geh nti ueh n’hanh ntĭm ueh.

Nkah tay nău ngơi bâh wa Hồ “Yor nău geh 10 năm tăm tơm si, yor nău geh rhiăng năm mât kon nuĭh”, Thủ tướng ŭch ăp nai nti n’hanh kon hoc ngih nti Huỳnh Cương mbra n’hao nău way ơm, hun hao lĕ rngôch, geh âk nău dơi lơn tay tâm nău ntĭm n’hanh nti. Thủ tướng ŭch n’hanh knơm, đah nău mât kan bâh nuĭh leo kan ăp gâl, nău knơm n’hanh ŭch rŏng bâh mĕ bơ̆, nău nuih n’hâm bâh nai nti, nău ŭch rŏng bâh mom ndăm, ăp oh kon hoc nsrôih nti, tiăr nti ueh gay ma rgâl nău rêh bâh nơm tâm rgop rdâk njêng ƀon tơm, neh dak ăp nar lơ ma ueh lơn.

Nuĭh rblang: Thị Đoắt