Kêng măng 22/3, ta Nhih pah kan Chính phủ, Thủ tướng Chính phủ Phạm Minh Chính geh rơh pah kan đah Mpôl đại biểu Hội đồng tăch rgâl Hoa Kỳ-ASEAN (USABC). Ta rơh pah kan, Thủ tướng lah rjăp, Việt Nam way uănh khlay Hoa Kỳ lah ngoăy tâm ăp dak tâm boh khlay dâk bôk năp, rhơn rnê Hoa Kỳ ŭch du Việt Nam dăng, đăp mpăn n'hanh têh ndrŏng.

Việt Nam ŭch rŏng ntrŭt ntrôl tâm boh lam lĕ rngôch Việt Nam-Hoa Kỳ nar lơn ma ngăn ngăn, đăp mpăn, lăp tâng jru nsing kalơ nău uănh khlay đăp mpăn, ƀư tơm, lam lĕ rngôch neh dak n'hanh nău way trong kan chính trị nsum. Thủ tướng lah rjăp, Việt Nam mbra rvăt n'glăp ndơ máy móc, ntrŭp dŏng n'hanh ndơ nkra bah Hoa Kỳ gay rgâl geh tâm ban gân tăch rgâl Việt Nam-Hoa Kỳ. Thủ tướng nsing nơm, USABC n'hanh ăp doanh nghiệp Hoa Kỳ mbra rgop khlay ntrŭt ntrôl tâm boh lam  lĕ rngôch Việt Nam-Hoa Kỳ nar lơn ma ngăn ngăn, n'hanh lăp tâng jru nsing ta nău ndrel nsĭt geh, hun hao tay n'hanh nău kan an ƀon lan bar dak, rgop mât, đăp mpăn, tâm boh n'hanh hun hao ta nkual n'hanh lam ntŭr neh.