Weh rnoh âk dak tâm ăp n’glău n’gâr hŭch, tâm bah ri aơ ăp nhih máy thuỷ điện têh ta Tây Nguyên nchuăt n’gul wah da dê. Yơn lah nkô̆ nău đăp mpăn nkrŭl dak dŏng an nău têh, tŏ djrah an tơm tăm; n’hoch an bah dâng rnoh dak mpêt đê̆, hŏ dơi ăp công ty thuỷ điện tĭng jăp ăp quy định.

Công ty Thủy điện Ialy mât dŏng 3 nhih máy thủy điện têh ta njăr dak me Sê San lah: Nhih máy thủy điện Ialy, Nhih máy thủy điện Sê San 3, n’hanh nhih máy thủy điện Plei Krông, ta n’gor Gia Lai n’hanh Kon Tum. Lĕ rngôch rnoh dăng bah 3 nhih máy dja lah 1.080 MW, lĕ rngôch rnoh âk geh kơp rgum tât nar 30/6/2023 bah 3 nhih máy hŏ nchuăt luh rlău 102 rmen 246 rkeh kWh. Yơn lah tâm 6 khay bôk năm 2023, lam công ty njêng luh geh 1 rmen 955 rkeh kWh điện, tât 41,68% trong nchrăp, hŭch 330 rkeh kWh rđĭl đah ndrel khay dja năm 2022.  

        Lah nhih máy Thủy điện dŭt têh ta njăr dak me Sê San, Thủy điện Ialy hŏ tĭng ƀư jăp nău khlay kan bah nhih máy âk ntil dŏng: nchuăt luh điện, tâm pă tâm ban n’hong hoch, kân bah dak bŭk tâm khay mih n’hach; pă dak tŏ an bah dâng khay wai. Nkre, rhŏ tŏng dak tŏ an bah dâng dak bât tâm ban kơt mât dŏng geh nău tam tơm dak an nchuăt điện đŏng. Wa Đinh Viết Thiện, Groi giám đốc Công ty Thuỷ điện Ialy, lah:

“Khay wai năm aơ tât khuch êng tĭng ntŭk, tâm ăp khay kêng dŭt khay mih ri rnoh dak rsŭn tât dak bât hŭch. Tâm ăp khay 3 n’hanh khay 4 ri rnoh âk dak hoch tât dak bât đêt, rnoh dăng hŭch tât bơi 90%. Jêng geh rnôk rnoh dak tâm n’glău dak bât huăt gay đăp mpăn rnoh âk dak ân geh, tâm ban kơt rnoh dŭt đêt hoch bah dâng dak bât tĭng di rêng tâm ntêng lêng n’glău dak bât. Mpeh bah công ty hŏ geh nău mbơh năch ngăch đah ăp nhih pah kan mât uănh ngih dak, nhih pah kan bah lơ lah tập đoàn tâm ban kơt UBND n’gor Gia Lai n’hanh Kon Tum gay dăn đă trong nchrăp mât dŏng mhâm ƀư gay tâm ban geh tơm dak, đăp mpăn rnoh tât kan lah pă an dak dŏng bah nuĭh ƀon lan tâm ban kơt pă dak kan tuch tăm đŏng. Tât 30 khay 6 nău mât rnoh dak đăp mpăn  tŏng geh an hoch bah dâng ri hŏ dơi geh rgâl âk đŏng.”

        Wa Hồ Trung Đông, Bí thư Đảng uỷ, giám đốc Công ty hun hao thuỷ điện Sê San an gĭt: Khay wai năm aơ rnoh dak rsŭn hoch tât n’glău dak bât hŭch rđĭl đah rĭng geh ăp năm, hŭch tât 15% rđĭl đah năm 2022. Tâm rnôk mât dŏng aƀaơ nhih máy tŏng lĕ rngôch ăp nău ŭch geh bah lam rêng kan gưl neh dak. Nău êng ta thuỷ điện Sê San lah geh n’glău dak bât nkrŭl ntêm dak bah kơi tua bin nchuăt luh điện. Jêng nkô̆ nău tâm pă dak an bah dâng dơi nchrăp lor ma đêt khuch tât nchuăt luh jêng điện. Wa Hồ Trung Đông lah:          

        “Tâm rêng tâm ntêng lêng âk n’glău n’gâr dak 215 bah Thủ tướng Chính phủ năm 2018, geh quy định đah mpôl hên mpeh khay wai mpôl hên ân tŏng geh dŭt đêt lah 195 mét khối/giây dak an hoch bah dâng. Tâm rnôk nchuăt dŏng ri mpôl hên geh du n’glău nkrŭl tâm pă tâm ban dak gay nkra rnôk mpôl hên nchuăt âk ri rnoh dak nkrŭl lăp tâm nê, n’hanh rnôk mpôl hên mô nchuăt điện ri mbra pơk luh bah n’glău n’gâng Sê San 4. Tâm mhe  aơ ri mpôl hên tŏng an nău ŭch geh mpeh rêng n’hoch pă dak an bah dâng gay đăp mpăn tŏng an dak me sông Mê Kông. Nkre geh rnôk dŭt kroh phang ngăn, rnôk mô tŏng dak gay nchuăt điện tĭng lam njăr dak me ri mpôl hên lor mbơh đah Uỷ ban sông Mê Kông, lor mbơh đah Cục Tài nguyên Môi trường dak gay ăp ding kan nsum tâm pah kan mât dŏng.”

           Công ty Thuỷ điện Buôn Kuốp mât dŏng 3 nhih máy thuỷ điện tâm njăr dak me Srêpôk đah bar n’gor Dak Lak n’hanh Dak Nông lah: Nhih máy thuỷ điện Buôn Tua srah, Nhih máy thuỷ điện Buôn Kuốp n’hanh nhih máy thuỷ điện Srêpôk 3. Lĕ rngôch rnoh dăng bah 3 nhih máy thuỷ điện dja lah 580 MW. Wa Nguyễn Đức, groi giám đốc Công ty Thuỷ điện Buôn Kuốp an gĭt: 6 khay aơ, lĕ rngôch rnoh âk geh điện bah 3 nhih máy dja lah 915 rkeh kWh điện, dah 79% rđĭl đah ndrel khay dja năm 2022. Rnoh âk geh điện hŭch lah tă bah mô tŏng rnoh dak bah kêng dŭt khay mih, n’hanh lơn ma hŭt tâm ăp khay 3 n’hanh 4 mhe aơ. Yơn lah nkô̆ nău nchuăt dŏng tĭng rêng tâm ntêng lêng ăp n’glău dak bât bah Thuỷ điện Buôn Kuốp way tĭng ƀư jăp đŏng.

“Công ty hŏ lor kan nsum đah ntŭk rgum tâm pă tâm ban trong rse điện gưl neh dak gay tâm pă dak đăp mpăn tŏng geh an nău kan tuch tăm bah dâng. Tât khay 5 ri rnoh dak hŏ thơl đah dak bât bah tu Buôn Tua Srah, Công ty hŏ mbơh nô nău tât UBND n’gor gay geh trong rƀŏng rđău đă nchuăt tâm ban kơt mâp dŏng tâm di đŏng. Tâm khay 5 ri UBND n’gor hŏ jao an Sở Công thương ƀư tơm pah kan đah công ty. Tĭng nê tâm n’gul khay 5, hŏ geh trong tâm ban ŭch lah ndjoh dak an bah dâng rnoh dŭt đêt, nkrŭl dak gay rhŏ dŏng an lĕ ma khay wai. Tât kêng dŭt khay 5, ri rnoh dak ta dak bât Buôn Tua Srah hŏ wăch tât rnoh di tĭng quy định bah rêng mât dŏng tâm ntêng lêng hoch ăp n’glău n’gâr”./.