VOV4.M’nông: Rlău n’gul khay bah năp ta nkuăl Kon Plông, n’gor Kon Tum lĕ geh âk rơh n’gơ neh n’hanh n’glơi an geh tay. Lơn lah kêng măng nar 23/8 geh rơh n’gơ neh dăng 4.7, têh ngăn tâm nklăp 100 năm bah năp. Ta năp nu nău jêr njrăng bah ntil trôk nar lơh aơ, nău tŏng ăp đăp mpăn n’glău n’gâr dak thủy điện, dak bât gay njrăng rdâng đah n’gơ neh ta Kon Tum dôl dơi n’gâng kan ƀon lan kơt ntŭk kan mât uănh dŭt mĭn tât.

Ta nkuăl Kon Plông, n’gor Kon Tum, ntŭk n’gul khay bah năp lĕ geh âk rơh n’gơ neh n’hanh n’glơi an geh tay aƀaơ geh 6 ntŭk thủy điện n’hanh 125 ntŭk dak bât. Wa Lê Đức Tín, Groi kruanh UBND nkuăl Kon Plông, an gĭt ta năp nu nău n’gơ neh, n’glơi an geh tay na nao, nu nău jêr njrăng, n’gâng kan nkuăl lĕ ntop n’hao trong kan mât uănh, groi uănh ngăn đah 2 n’glău n’gâr dak thủy điện têh, geh: Đăk Đrinh đah rnoh nkrem dak rlău 248 rkeh m3 dak n’hanh n’glău dak bât thủy điện Thượng Kon Tum đah rnoh dak rlău 145 rkeh m3 dak:

“Nkuăl ƀa ƀơ uănh nđôi, groi uănh nău ƀư nkrem dak tâm n’glău bah ăp nuĭh tơm ƀư thủy điện. Jêh uănh nđôi, groi uănh khân pơng tĭng nău rgop ntĭm rđău bah Trung ương đah n’gor, mô ntêm dak âk tĭng rnoh dăng bah rnoh dak n’glău. 2 tay đă khân pơng ntrôl ngăch nău nglăp ăp trạm quan trắc. Ntop tay trạm quan trắc ri nău mbơh di na nê̆ lơn. Rnôk trôk nar lơh ri tĭng nău ƀư pơk dŏng geh nău rgop jăp đah nuĭh tơm đah n’gâng kan ta ntŭk n’hanh Ban ntĭm rđău njrăng n’gang phŭt sial dak lip bah nkuăl”.

Uănh nđôi đăp mpăn n’glău n’gâr dak thủy điện Thượng Kon Tum jêh ăp rơh n’gơ neh.

Dơi uănh lah ngoăy tâm âk nău khuch jêng ƀư ăp rơh n’gơ neh ta nkual nkuăl Kon Plông, n’gor Kon Tum, trong kan mât uănh, nău pơk dŏng n’glău n’gâr dak thủy điện Thượng Kon Tum aƀaơ dơi dơi ƀư tĭng rjăp. Ndrel đah 3 trạm quan trắc weh uănh n’gơ neh lĕ nglăp, Công ty Thủy điện Thượng Kon Tum tâm ton đah Viện Vật lý địa cầu nglăp tay 3 trạm gay mbơh ngăch n’hanh rhŏ an mĭn njêng jru mpeh n’gơ neh tâm nkual. Ntŭk kan aơ lĕ manh mbơh ntĭm way kan kơp mĭn tay gưl n’gơ neh tâm di đah ăp rnoh dak êng êng n’hanh tĭng nău ê nkra dak bât dơi rdâng n’gơ neh gưl 7. Wa Trần Công Đàm, Kruanh Công ty Thủy điện Thượng Kon Tum, mpeh tâm Công ty Cổ phần Thủy điện Vĩnh Sơn-Sông Hinh mĭn lah, ntŭk kan tĭng rjăp ăp nău pơk dŏng 2 n’glău n’gâr n’hanh lĕ an trong rdâng đah n’gơ neh:

“Công ty pơk dŏng n’glău n’gâr tâm nĕ geh nău rnoh dak n’glău yan mih dak lip kơt yan soăt tĭng trong ƀư 2 n’glău n’gâr ta dak me Sê San n’hanh trong pơk dŏng n’glău Thượng Kon Tum yor N’gâng kan Công thương uănh an. Ƀư tĭng ăp trong ƀư quan trắc tĭng di Nghị định 114 n’hanh ăp nău ntrŭnh kơt ntĭm rđău êng bah Trung ương đah n’gor. Công ty lĕ an trong ƀư rdâng n’gơ neh gay ma rnôk geh n’gơ neh cán bộ nuĭh kan Công ty mbra nchrăp lor n’hanh ngăch ƀư tĭng ăp trong njrăng rdâng ma mô kâp ntĭm rđău bah gưl ka lơ jêng tât mbrơi”./.

Nuĭh rblang: Y Sưng Phê Ja