Nar 26/2, ta Thủ đô Hà Nội, ƀư rơh mâp gưl têh đah Đảng Cộng sản Việt Nam n’hanh Đảng Ƀon lan Cách mạng Lào tă bah Tổng Bí thư Nguyễn Phú Trọng n’hanh Tổng Bí thư, Kruanh dak Lào Thoong-lun Xỉ-xu-lít ndrel ƀư tơm.

Aơ lah nar kan khlay rgop n’hao dăng n’hanh ƀư jru hvi lơn đŏng tâm boh tâm rnglăp têh kuâng, tâm rnglăp mha êng, tâm boh lam lĕ rngôch đah bar Đảng, bar Ngih dak n’hanh ƀon lan bar dak Việt Nam - Lào. Ta rơh mâp, bar kruanh rđău  kan lah rjăp nău way ơm krêp dêh, tâm kơl nsum; lah rjăp nău tâm boh Việt Nam - Lào lah drăp ndơ dŭt khlay bah bar rnoi nuĭh, lah nău khlay, lah nău way lịch sử n’hanh lah tơm suan dŭt têh dăng bah bar Đảng, bar dak ân dơi ntik n’hao, nđơn tay an ăp rơh kơn bah kơi tay. Tổng Bí thư Nguyễn Phú Trọng lah rjăp, tâm boh Việt Nam - Lào way mât nău khlay mha êng, lah an ƀư lor bôk năp tâm trong kan tâm boh dak bah dih bah Việt Nam; nkre lah rjăp du đêt nkô̆ tơm gay n’hao dăng tâm boh đah bar đảng, bar dak tâm let năp tay.

Ta rơh mâp, Thủ tướng Chính phủ Phạm Minh Chính n’hanh Thủ tướng Chính phủ Lào Xỏn-xay Xỉ-phăn-đon tâm ban ŭch bar đảng, bar dak ân n’hao dăng tay tâm rnglăp, ntrôl dăng n’gâng tơm tâm boh mpeh njrăng n’gang neh dak- rnă njrăng n’hanh tâm boh dak bah dih; njêng đăt ndal tâm boh wăng sa; rgâl mhe tay, n’hao nău dơi tam tâm boh ta ăp trong kan, gay n’hao dăng lơn đŏng tâm boh mha êng Việt Nam - Lào, yor ma nău geh ngăn ngăn ƀon lan bar dak, yor ma đăp mpăn, tâm boh n’hanh hun hao bah nkual n’hanh lam ntŭr neh./.