Ôi 28/8, ta Hà Nội, Tổng Bí thư, Kruanh dak Tô Lâm, Bí thư Quân uỷ Trung ương ƀư tơm rơh tâm nchră đah Ban Thường vụ Quân uỷ Trung ương mpeh nău tĭng ƀư nău dơn kan tahen, njrăng n’gang neh dak ntơm bah bôk năm kan Đại hội 13 bah Đảng tât aƀaơ. Nkoch mpeh ăp nău dơn kan, trong nkra tât năm 2025, Tổng Bí thư, Kruanh dak Tô Lâm đă Quân ủy trung ương, Bộ Quốc phòng rgum tĭng ƀư jăp nău dơi kan nsŏng kơl têh jong đah Đảng, Ngih dak mpeh tahen, njrăng n’gang neh dak; lor nchrăp ngăch ngăr n’hao nău dơi gŭ mĭn, nchroh lor, geh trong rdâng lơh ngăch prăl, geh nău tam  ăp nău tât, mô an geh ndrât ndal.

Kan nsum an ƀư geh nău tam Nghị quyết Trung ương 8 khóa XIII mpeh trong mât njrăng neh dak tâm nô nău mhe; ăp trong nchrăp, đề án, nchrăp ƀư, lam  rêng pháp luật mpeh tahen, njrăng n’gang neh dak. Lor nchrăp gŭ mĭn, dăn đă n’gluh an dŏng ăp trong nchrăp, trong kơl, pháp luật mpeh tahen, njrăng n’gang neh dak, tŏng đah nău ŭch geh dơn kan mât njrăng neh dak lĕ ma ta năp măt n’hanh jŏ jong. Tổng Bí thư, Kruanh dak Tô Lâm lah kloh nău mĭn lam tahen ân đăm jru tay lơn đŏng nău tĭng ƀư gung trong njrăng n’gang neh dak lam ƀon lan, lam ƀon lan dâk lơh, mât njrăng neh dak tâm nô nău mhe, đah nău mĭn nsing tâm “ƀon lan lah n’gu tơm”, lah rgum tơm, lah n’gâng tơm; n’hao nău tam, nău dơi mât uănh ngih dak mpeh njrăng n’gang neh dak ta ăp gưl.