Ôi 9/9, ta Nhih pah kan kruanh dak, Tổng Bí thư, Kruanh dak Tô Lâm n’hanh I ur ƀư tơm rơh wơt Tổng thống Cộng hòa Mozambique n’hanh I ur khâl ngăn Việt Nam. Tâm ăp năm rlău aơ, tâm boh chính trị, tâm boh way ơm, tâm rnglăp dơi hun hao uĕh lăng, mpơl ma âk trong hăn khâl gưl têh, tâm khâl ăp gưl bah kruanh rđău kan bar dak.

Bar dak hŏ ký ton âk trong tâm boh ta ăp trong kan chính trị tâm boh tâm brê, wăng sa, tăch rgâl, ntuh kơl, tuch tăm, tui ka, khoa học-công nghệ, viễn thông, dak si, ntĭm nti, văn hóa, đăp mpăn – rnă njrăng, prăk kaih, ngân hàng, tâm boh gưl n’gor… nta trong dơh an ăp n’gâng kan pơk hvi tâm boh. Lôch wơt, Tổng Bí thư, Kruanh dak Tô Lâm n’hanh Tổng thống Mozambique geh rơh tâm mâp êng n’hanh lôch nê leo mpôl ntơh măt gưl têh bar dak ƀư tâm nchră, uănh năl jêh geh tâm boh đah bar dak tâm bah ri aơ n’hanh dăn đă ăp trong rƀŏng tâm boh let năp tay.