Nar ntri (11/5), ta Nhih pah kan Trung ương Đảng, Tổng Bí thư, Kruanh dak Tô Lâm hŏ kuăl điện tâm nchră đah Tổng thống Liên bang Thụy Sĩ Guy Parmelin. Ta rơh kuăl điện tâm nchră, Tổng Bí thư, Kruanh dak Tô Lâm lah rjăp Việt Nam way uănh khlay tâm boh dêh bên n’hanh tâm boh âk ntil đah Thụy Sĩ, ŭch rŏng bar ding kan nsum tay lhăt, an ƀư geh nău dơi n’hanh ƀư jru hvi lơn đŏng tâm boh lam lĕ rngôch dơi njêng tâm khay 01/2025.

Bar kruanh rđău kan mĭn lah tâm nô nău lam ntŭr neh duh jêr rgâl ngăch n’hanh jêr nchroh năl , bar dak ân n’hao âk trong tâm dâl nău, rdâk nâp nsing nơm chính trị n’hanh ƀư jru hvi lơn đŏng tâm boh âk ntil. Mpeh tâm boh âk ding, bar kruanh rđău kan tâm ban ŭch n’hao dăng kan nsum ta ăp rnôk rgum nchră lam ntŭr neh n’hanh tâm trôm bôk nău kan Liên hợp quốc gay rgop nkra ăp nkô̆ nău lam ntŭr neh ndrel uănh khlay nsing ta nău uănh khlay luật pháp lam ntŭr neh, yor an bah tâm lơh tâm su, đăp mpăn n’hanh hun hao têh ndrŏng ta nkual tâm ban kơt lam ntŭr neh.