Ntoh ngơi ta rơh lễ, Tổng Bí thư, Kruanh dak Tô Lâm lah na nê̆, lơ 2/9/1945, ta Quảng Trường Ba Đình lịch sử, kruanh Hồ Chí Minh lĕ geh răk Bản tuyên ngôn độc lập ntoh  lư mbơh đah lam ntur neyh nău ntoh luh bâh dak Việt Nam Dân chủ Cộng hòa, aƀaơ lah dak Cộng hòa xã hội chủ nghĩa Việt Nam. Tâm 79 năm ba năp, đah nău leo kan bâh Đảng, hăn tĭng nău jă bâh Wa, ntoh ang nău tâm ton đăp mpăn, đah nău mbơh mô dơi roh “mô geh ntil ndơ khlăy lơn đah đăp mpăn, ueh lăng”, lĕ rngôch ƀon lan Việt Nam lĕ tâm rnglăp du nuih n’hâm, rbăn rmưn kon nuĭh tâm ban ngoăy, ndrel đah nău tâm rnglăp lam ntur neh ntoh ang, ndơ̆ cách mạng Việt Nam geh nău dơi aơ tât nău dơi êng, rklaih đăp mpăn mpôl rnoi, dơn ngoăy neh dak, ƀư dơi nău kan rgâl mhe, joat nâp tĭng chủ nghĩa xã hội. Tổng Bí thư, kruanh dak lah na nê̆, dơi geh nău dơi têh khlăy lôch 79 năm njêng neh dak, lah nău mĭn rŏng dak, tâm rnglăp mpôl rnoi, lĕ nău nsrôih, hun hao, nău ŭch têh kuăng mpeh mpôl rnoi, đăp mpăn, hơm răm bâh Đảng, ngih dak n’hanh ƀon lan Việt Nam.

Kêng măng 29/8, Tổng Bí thư, Kruanh dak Tô Lâm, Kruanh Tiểu Ban nău kan Đại hội 14, Kruanh Ban ntĭm rđău dăp rgum cán bộ gưl têh lĕ ƀư tơm rơh rƀŭn Tiểu ban n’hanh Ban ntĭm rđău. Ntoh ngơi n’glôn jêh ăp rơh rƀŭn, Tổng Bí thư, Kruanh dak Tô Lâm lah rjăp trong kan cán bộ lah “nău tơm” bah “n’gâng tơm” tâm trong kan ndâk njêng Đảng, an dơi nchrăp rjăp, nanê̆. Aơ lah ăp nău kan khlay gay nchrăp nuĭh kan Ban chấp hành TW, Bộ Chính trị, Ban Bí thư khóa 14 tâm di nău ŭch ntĭm rđău ƀư tĭng nău kan chính trị n’hanh ndâk njêng rmôt cán bộ gưl prêh bah Đảng tŏng nău rêh, nău blău, nsing nơm tâm ban nău kan tâm lvang tât. Dăp rgum Ban chấp hành TW Đảng, Bộ chính trị, Ban Bí thư lah nău kan dŭt khlay n’hanh dơi ƀư ƀa ƀơ bah aƀaơ tât Đại hội 14 bah Đảng, rhăt jăp đah nău pă dăp, nchrăp du trong nuĭh kan ntĭm rđău tơm ăp ngih pah kan, ntŭk kan, ƀon lan tâm năm kan tât.