Tâm trôm pah kan râng Pơh lễ gưl prêh Đại hội đồng Liện hợp quốc khóa 79 n’hanh pah kan ta Hoa Kỳ. Tổng Bí thư, Kruanh dak Tô Lâm lĕ mâp cán bộ, nuĭh kan ngih pah kan ntoh măt Việt Nam ta Hoa Kỳ. Kruanh dak mĭn lah, rơh pah kan aơ bah rmôt geh nkô̆ nău khlay gay ƀư trong nchrăp tâm rnglăp bah dih bâh Đảng n’hanh Ngih dak n’hanh tât aƀaơ lĕ geh âk săk rnglăy uĕh, rhŏ an nău hun hao neh dak; geh nău kơl tâm rnglăp bah dih đăp mpăn, ƀư tơm, rgop uĕh an nău mât tâm rnglăp, đăp mpăn n’hanh nău hun hao nsum bah lam ntŭr neh.

Tổng Bí thư, Kruanh dak mĭn lah Hoa Kỳ lah ngoăy tâm âk ntŭk khlay tâm nău kơl tâm rnglăp bah dih bâh Việt Nam n’hanh lah ntŭk tăch dôl dŭt n’hâm âk n’hanh nău geh đah ăp doanh nghiệp tâm dak. Nău 2 dak n’hao prêh tâm boh kan ndrel lĕ rngôch lĕ rgop ndơ̆ tâm boh 2 dak nar lơ ngăn ngên, hăn lăp jru ta lĕ rngôch ăp ntil nău, bah chính trị, tăch rgâl, ntuh kơl an tât rnă njrăng, mât njrăng bri dak.