Nkhêp geh râng ăp nău kan pơh Pơh lễ gưl têh Đại hội đồng Liên hợp quốc khoá 79 n’hanh pah kan ta Hoa Kỳ, kêng măng 23/9, Tổng Bí thư, Kruanh dak Tô Lâm hŏ râng rơh rgum nchră đah ăp doanh nghiệp dâk bôk năp bah Hoa Kỳ. 

Nsing ta nău djăt ăp nău nkoch, nău rgop ta rơh rgum nchră n’hanh mâp măt âk tập đoàn dâk bôk năp, Tổng Bí thư, Kruanh dak an gĭt nău năl dơi nuih n’hâm nđơr mpôl doanh nghiệp Hoa Kỳ gay ndrel ntrŭt ntrôl pơk hvi nău kan tâm boh ntuh kơl đah Việt Nam tâm let năp tay, nkre ŭch rŏng doanh nghiệp Hoa Kỳ nsrôih nsan hao tay gay jêng nuĭh ntuh kơl dŭt têh ta Việt Nam, ntik n’hao săk geh, ndăn ăp trong dơh uĕh nsing ta nău tâm boh geh nău tâm ban, tâm uănh khlay nsum n’hanh bar ding ndrel nsĭt nău geh tâm ban đah nău tâm boh têh jong lam lĕ rngôch đah bar dak. Gay dơi tât rnoh nê, Tổng Bí thư, Kruanh dak dăn đă ăp n’gâng kan, ăp nhih pah kan geh tât bah bar dak ƀư jêng ngăn ngăn ăp trong nchrăp, trong rƀŏng têh tâm boh têh jong lam lĕ rngôch bar ding; năn ntop kơl, nkra bah ăp jêr jŏt, kŏ kol bah ăp nuĭh ntuh kơl. Tổng Bí thư, Kruanh dak ŭch rŏng chính phủ Hoa Kỳ mbra ntrŭt ntrôl doanh nghiệp Hoa Kỳ n’hao âk ntuh kơl ta Việt Nam, nkre nta trong dơh, ntop kơl tay ăp nuĭh ntuh kơl bah Việt Nam pơk hvi nău kan ntuh kơl tăch rgâl nsĭt geh nău tam.