Ôi lơ 22/9 tĭng mông ta ntŭk, rơh rƀŭn nchră gâl têh let năp tay lĕ ntơm pơk na nê̆ ta ntŭk kan LHQ ta New York, Hoa Kỳ đah nău tât râng bâh âk nuĭh leo kan gâl têh ăp dak, ăp ntŭk kan lam ntur neh n’hanh ta nkual, ndrel đah ndơn kan ăp ntŭk kan bah dih chính phủ, mpôl kan khoa học, tơm prăk n’hanh doanh nghiệp. Tổng Bí thư, Kruanh dak Tô Lâm leo mpôl đại biểu gâl têh dak he tât râng rơh rƀŭn nchră.

Ntoh ngơi ta rơh rƀŭn nchră, Tổng Bí thư, kruanh dak Tô Lâm an gĭt, Việt Nam rnê ăp văn kiện geh mbơh an dŏng ta rơh rƀŭn nchră n’hanh ŭch ăp nkô̆ nău văn kiện mbra geh mbơh tơih răng dăng, săk rnglăy. Việt Nam ŭch LHQ đah nău kan ƀư tơm, leo pă n’hanh ăp ntŭk kan lam ntur neh geh tay ăp nău tâm rgop na nê̆ lơn, săk rnglăy lơn, têh dăng lơn tâm nkô̆ mpŏng njrăng nău tât đah nău hun hao ngăch, nâp nâl bâh lam ntur neh bâh ntơm nar aơ. Việt Nam ton mbra tâm rgop âk, săk rnglăy ta ăp nău nsrôih nsum gay ma rdâk njêng lam ntur neh đăp mpăn, hun hao tâm ban yor nău rêh đăp mpăn, hơm răm bâh kon nuĭh.