Nar 16/8, Tổng Bí thư Nguyễn Phú Trọng ƀư tơm rơh hop Ban rđău đă Trung ương mpeh njrăng, n’gang sa khâm, tih djơh. Ban rđău đă năl lah, tâm 6 khay bôk  năm 2023 n’hanh ntơm bah bôk năm kan Đại hội XIII bah Đảng tât aƀaơ, nău kan bah Ban rđău đă dơi rgâl mhe tay lĕ ma nkô̆ n’hanh trong ƀư, ntoh lư lah âk trong nchrăp, trong nkra dơi an ƀư lĕ n’hâm suan, njêng geh nău tam kloh tâm pah kan njrăng n’gang sa khâm tih djơh.

 Ăp khay kêng dŭt năm 2023, Ban rđău đă ăp gưl ủy, mpôl kan đảng, nhih pah kan dơi kan rgum rđău đă, tĭng ƀư geh nău tam ăp nău dơn kan tĭng bôk nău kan năm 2023 bah Ban rđău đă n’hanh ăp nău n’glôch jêh bah Tổng Bí thư, Kruanh Ban rđău đă, tâm nê rgum tâm ăp nău dơn kan kơt rđău đă ntrôl dăng tay rdâk njêng, ƀư lôch jêh ăp tŏng trong đă tĭng gay njrăng n’gang sa khâm tih djơh. Rgum tơm lah ơm lôch jêh trong đă tĭng ƀư gay mât kân nău kan têh, njrăng n’gang sa khâm tih djơh tâm ăp trong kan dơh ntoh luh sa khâm, tih djơh; mât njrăng nuĭh lah phong, mbơh nău lư mpeh sa khâm, tih djơh. Rđău đă n’hao dăng hăn ôp uănh, groi nđôi, kơp nđăp tâm ăp trong kan dơh ntoh sa khâm, tih djơh n’hanh ndăn ƀư lôch jêh hăn ôp uănh, groi nđôi ăp way nkô̆ tĭng trong nchrăp bah Ban rđău đă.