Ôi 15/5 ta Nhih pah kan Trung ương Đảng, Tâm nchră n’gul năm kan Ban Chấp hành Trung ương Đảng khoá 13 ntơm pơk ngăn ta nâm nău ƀư tơm bah Tổng Bí thư Nguyễn Phú Trọng.

 Lah ta rnôk ntơm pơk tâm nchră, Tổng Bí thư Nguyễn Phú Trọng lah kloh, Tâm nchră geh nkô̆ dŭt khlay đah nău ƀư lôch jêh geh nău dơi Nghị quyết Đại hội XIII bah Đảng; lah rnôk gay ŭanh tay du trong tâm di, lam lĕ rngôch ăp nău dơi hŏ geh ntơm bah bôk năm kan tât aƀaơ, nchŏng luh ăp mpăng đêt, rbăn lhơ, nchiăng khan, nkô̆ n’hanh nău tă ơm gĭt kơt nti; nchroh tâm nô nău mhe đah ăp trong dơh soih n’hanh jêr jŏt, ntul rlong dôl tâm păch pêng; gay ntơm bah nê, n’gluh ăp trong nchrăp, n’glêh an têh ân rgum rđău đă, nchŏng đă tĭng ƀư tâm n’gul kêng dŭt năm kan bah khoá XIII. Tổng Bí thư Nguyễn Phú Trọng đă, Trung ương n’hanh ăp nuĭh râng tâm nchră ntô̆ n’hao uĕh bôk rngok gĭt blău, n’hao nuih n’hâm dơn kan, rgum gŭ mĭn, tâm nchră na nê̆, an nău rgop gay ƀư lôch jêh nău mbơh ŭanh năl tih di kruanh rđău kan, nchŏng đă bah Bộ Chính trị, Ban Bí thư n’gul năm kan n’hanh du đêt nău dơn kan rgum tơm tât lĕ năm kan Đại hội XIII bah Đảng.