Nar 24/3, Tổng Bí thư Nguyễn Phú Trọng hŏ râng n'hanh lah ta rơh nkah ndray 60 năm Kruanh Hồ Chí Minh mâp măt rmôt nuĭh gĭt blău 40 năm nar njêng Liên hiệp ăp Hội Khoa học n'hanh Kỹ thuật Việt Nam. Tổng Bí thư Nguyễn Phú Trọng lah rjăp: "Tâm ăp rơh mhe, ta ăp dak, rmôt nuĭh gĭt blău way lah du mpôl kan khlay ntrŭt ntrôl nău hun hao bah rêh jêng kon nuĭh".

Tổng Bí thư dăn đă, ăp mpôl kan khoa học n'hanh công nghệ, rmôt nuĭh gĭt blău khoa học n'hanh công nghệ dak he, lơn lah rmôt gĭt blău, ăp nuĭh khoa học mpeh Liên hiệp ăp Hội Khoa học n'hanh Kỹ thuật Việt Nam ân nsrôih, rgop âk lơn, geh nău tam an n'gâng kan rdâk njêng n'hanh hun hao ngăch n'hanh nâp dăng bah neh dak. Tổng Bí thư Nguyễn Phú Trọng đă, n'hao dăng rdâk ƀư, n'hao nău dơi tam kan bah Liên hiệp ăp Hội Khoa học n'hanh Kỹ thuật Việt Nam bah Trung ương tât n'gor; nsŏng kơl rdâk njêng trong kan, nta trong dơh an rmôt nuĭh gĭt blău kan n'hanh rgop an nău hun hao bah neh dak nơm.