Kêng măng 25/8, tâm rnôk hăn pah kan ta n’gor Lạng Sơn, Tổng Bí thư Nguyễn Phú Trọng tât khâl n’hanh pah kan ta mpông n’har bri tâm rnglăp. Mpông n’har bri tâm rnglăp dak bah dih gŭ ta trong Quốc lộ 1A, ngai đah nkual ƀon têh Lạng Sơn 17km mpeh bah lơ, ngai đah nkual ƀon têh Hà Nội 171 km mpeh bah lơ luh nar. Ntŭk ƀư âk nău kan luh lăp đah Việt Nam n’hanh Trung Quốc. Ta Mpông n’har bri tâm rnglăp dak bah dih geh n’gâng ntăm 1116 ntrŭp Quốc huy bah dak Cộng hòa xã hội chủ nghĩa Việt Nam huêng khlay bah neh dak, aơ lah ntơm bôk Quốc lộ 1A nthoi Lạng Sơn đah Mũi Cà Mau.

 Mpông n’har bri tâm rnglăp dak bah dih lah ntŭk khlay tâm trong soih aih wăng sa, rgop ntrŭt ntrôl hun hao wăng sa đah Việt Nam n’hanh Trung Quốc ndrel ăp dak tâm nkual ASEAN. Njăr trong soih lah: Nam Ninh - Lạng Sơn - Hà Nội - Hải Phòng tĭng nău tâm ton đah kruanh gưl têh bar dak…Ta aơ Tổng Bí thư Nguyễn Phú Trọng hŏ ôp khâl n’hanh pă nklâm ndơ an mpôl kan rgop âk n’gâng kan pah kan ta mpông n’har bri. Nkhêp geh rnôk dja Tổng Bí thư Nguyễn Phú Trọng geh rơh tâm ôp du ƀlât đah Đại sứ Trung Quốc ta Việt Nam Hùng Ba. Tổng Bí thư Nguyễn Phú Trọng dăn đă, n’gor Lạng Sơn n’hanh mpôl kan dơi kan ta Mpông n’har bri tâm rnglăp dak bah dih ntik uĕh, rgop uĕh lơn đŏng tâm trong ntrŭt ntrôl tâm boh đah Việt Nam - Trung Quốc nar lơn ma hun hao. Bah năp nê, bôk mông kêng măng 25/8, Tổng Bí thư Nguyễn Phú Trọng ndrel mpôl pah kan hŏ tât khâl pă nklâm ndơ rnăk wa Nguyễn Xuân Khoát, cán bộ kruanh cách mạng ơm n’hanh rnăk wa Bạch Thị Khôi cán bộ ntơm dâk lơh ta nkual ƀon têh Lạng Sơn.