Ôi 25/8, Tổng Bí thư Nguyễn Phú Trọng leo mpôl hăn pah kan Trung ương hŏ tât khâl n’hanh ƀư tơm rơh pah kan đah Ban Thường vụ Tỉnh uỷ n’hanh nsum mpôl kruanh rđău kan n’gâng tơm n’gor Lạng Sơn. Ta rơh pah kan, nkah tay ăp nău nkah uĕh đah aƀaơ bơi 10 năm sĭt khâl n’hanh pah kan ta n’gor Lạng Sơn, Tổng Bí thư Nguyễn Phú Trọng mpơl nău rhơn ăp nău rgâl bah n’gor n’hanh nchŏng kloh đŏng ăp nău nchiăng khan, mpăng đêt kơt: Rnoh têh wăng sa bah n’gor hôm jê̆; hun hao mô hŏ tâm di  đah săk geh, dơh uĕh n’hanh lhoi hun hao bah n’gor.

Săk tam n’hŭch ach o n’hanh hŭch ach o jŏ jong hôm âk jêr jŏt, lơn lah ta nkual jru, nkual ngai, nkual rnoi mpôl đê̆…Mpeh nău dơn kan tâm let năp tay, Tổng Bí thư Nguyễn Phú Trọng dăn đă, Đảng bộ Lạng Sơn n’gluh rnoh tât kan, nău dơn kan n’hanh rêng đăt ndal, gay rgum rđău đă, njêng rgâl mhe, dăng lơn đŏng, tâm hun hao wăng sa- rêh jêng kon nuĭh, kơt Nghị quyết Đại hội Đảng bộ n’gor hŏ ntrŏng. Tâm nê ân ntrŏng kloh, hun hao wăng sa mpông n’har bri mô dơn gay hun hao wăng sa bah n’gor ma khlay lơn lah gay rgop an hun hao wăng sa bah lam dak, lơn lah ăp n’gor mpeh bah lơ, nkre n’hao dăng tâm boh kâng n’har tâm rnglăp, nsing nơm đah dak băl Trung Hoa.