Ôi 7/12 ta Hà Nội, Bộ Công an ƀư tâm nchră Đảng uỷ Công an Trung ương an nău rgop đah siƀŭt mbơh n'glôch jêh pah kan đảng bah Đảng bộ Công an Trung ương năm 2022 n'hanh trong rƀŏng, nău kan năm 2023. Tổng Bí thư Nguyễn Phú Trọng tât râng n'hanh lah rđău đă tâm nchră.

 Ta tâm nchră, Tổng Bí thư Nguyễn Phú Trọng, Kruanh dak Nguyễn Xuân Phúc, Thủ tướng Chính phủ Phạm Minh Chính nchih nkah, rnê âk nău nsrôih, nuih n'hâm leo lor n'hanh ăp nău dơi hŏ geh bah Đảng ủy Công an Trung ương (CATW), Bộ Công an tâm năm 2022; lah rjăp, Mpôl Công an ƀon lan hŏ ƀư lôch jêh uĕh ăp nău dơi jao. Mpeh nău dơn kan let năp tay, Tổng Bí thư Nguyễn Phú Trọng dăn đă, Đảng ủy Công an Trung ương mât uĕh tay nău khlay leo lor, uănh khlay pah kan rdâk njêng Đảng, rdâk njêng mpôl Công an ƀon lan, uănh aơ lah nău dơn kan n'gâng tơm bah năm 2023 n'hanh ăp năm bah kơi nê; mât uĕh nău khlay kan n'gâng tơm tâm rđău đă pah kan mât đăp mpăn rnă njrăng, rgop an ƀư geh nău tam ăp nghị quyết Trung ương mpeh hun hao wăng sa- rêh jêng kon nuĭh n'hanh đăp mpăn njrăng n'gang neh dak, rnă njrăng tât năm 2030, uănh ngai tât năm 2045 bah 6 nkual lam dak; nsrôih ƀư geh nău dơi tay n'hanh ƀư lôch jêh ŭeh nău kan dơi jao, ta năp măt lah năm 2023 n'hanh lĕ ma năm kan 2020 – 2025.

VOV/Nuĭh rblang: Điểu Thân