VOV4.M’nông: Kêng măng 21/3, ta ntŭk kan Trung ương Đảng, Tổng Bí thư Nguyễn Phú Trọng hŏ vơt wa Dato’ Sri Ismail Sabri Yaakob, Thủ tướng Malaysia, tât mbah tâm rnôk hăn khâl ngăn dak Việt Nam. Thủ tướng Malaysia mbơh đah Tổng Bí thư mpeh nau tă geh bah nau tâm nchră đah Thủ tướng Phạm Minh Chính, lah rjăp Malaysia uănh nau tâm boh kan nsum đah Việt Nam, ŭch bar ding ntrŭt dăng nau tâm boh bar ding tâm ăp nau kan văng sa, tăch rgâl, ntuh kơl ndrel tâm n’ur ƀon lan, ntoh nau mra tâm boh ƀư nau kan pâl n’aih ndrel tâm boh dak lêng đah Việt Nam gay ma ƀư ân ueh nau geh jêng bah bar dak. Tổng Bí thư Nguyễn Phú Trọng kŏ mbơh nchră đah Thủ tướng Malaysia mpeh nau dơi hun hao văng sa rêh jêng bah Việt Nam, lah rjăp nau kan du trong bah Việt Nam uănh khlay ndrel ŭch n’hao nau tâm boh kan nsum đah Malaysia, đă bar ding lŏ ƀư ueh ăp nau dơi tă geh, n’hao nau săk tam bah ăp nau kan tâm boh, tâm nê geh nau n’hao nau tâm boh đah ăp đảng ngăn, ntrŭt dăng nau tâm boh bar ding kŏ kơt lah tâm ASEAN ndrel ăp nau tâm nchră tâm nkuăl ndrel lam ntur neh./.

Nŭih rblang: H’Thi