Tổng Bí thư tâm nkoch mpeh ăp nău dơi têh, lĕ rngôch ma Việt Nam nsrôih dơi geh, njêng nău kan, geh nău dơi, nău knơm ta lam ntur neh kơt aƀaơ, lah na nê̆ trong hăn nchră nău đah dak bah dih đăp mpăn, kan êng, âk ding, âk nău tâm boh kan đah dak bah dih, tâm nĕ way geh uănh khlăy tâm boh kan đah ăp dak kiau meng.

Thủ tướng Anwar Ibrahim mbơh đah Tổng Bí thư Nguyễn Phú Trọng mpeh nău geh rơh tâm nchră đah Thủ tướng Phạm Minh Chính, lah na nê̆ nău ŭch ntrôl tâm kơl kan lĕ rngôch đah Việt Nam, tâm nĕ geh nău tâm boh kan đảng, tâm nkoch nău tă blau leo kan n’hanh hun hao, tâm kơl kan wăng sa, mât rnă njrăng ngih dak, đăp mpăn n’hanh tâm ăp trong kan mhe kơt wăng sa rnoh mbrô, rnă njrăng mạng n’hanh tâm rdâng đah ăp nău ntul rlong rnă njrăng mô geh nău way ơm. Thủ tướng nkoch nău tâm rgop kan đah Tổng Bí thư mpeh nău njrăng rdâng sa nkhiăn sa ƀer, nău kan mô di ta Malaysia n’hanh ŭch 2 ding ntrôl tâm kơl, nkoch nău tă blău kan ta trong kan aơ. Tổng Bí thư Nguyễn Phú trọng mpơl nău knơm lah rơh tât khâl bâh Thủ tướng Anwar Ibrahim lah nău kan mhe, ntop ntrôl hun hao bâh nău tâm boh kan đah bar dak.